ԵՐԵՎԱՆ, 24 փետրվարի — Sputnik. Եվրախորհրդարանի պատգամավոր Յարոմիր Շտետինան վերջերս երկու գործընկերոջ հետ այցելել է Արցախ՝ սահմանադրության բարեփոխումների հանրաքվեին որպես դիտորդ մասնակցելու համար, և Ադրբեջանը նրա նկատմամբ միջազգային հետախուզում է հայտարարել` «անօրինական կերպով Ղարաբաղ այցելելու համար»։ Նա չեխական Aktualne հրատարակությանը տված հարցազրույցում պատասխանել է ստեղծված իրավիճակի վերաբերյալ մի շարք հարցերի։
- Ադրբեջանը միջազգային հետախուզում է հայտարարել Ձեր նկատմամբ` Ղարաբաղ այցելելու համար։ Ինչու՞ եք գնացել այնտեղ, և ո՞վ է Ձեզ հրավիրել։
— Ես երկու գործընկերոջս հետ որպես դիտորդ այցելել եմ Լեռնային Ղարաբաղ` ԼՂ-ի խորհրդարանի հրավերով, որպեսզի հետևեմ հանրաքվեի ընթացքին։ Ճանապարհային ծախսերի մի մասը հոգացել է Եվրախորհրդարանը, մյուս մասը` ղարաբաղյան կողմը։
Ես և գործընկերներս եղել ենք 100 հոգուց կազմված դիտորդական թիմում։ Ես 90-ականներին` այդ սարսափելի պատերազմի ժամանակ, որպես լրագրող եղել եմ Ղարաբաղում։
- Դուք ինչ-որ պարգևատրում ստացե՞լ եք ուղևորության համար։
— Հարցը բացարձակ անտեղի է։ Թե՛ որպես քաղաքական գործիչ, թե՛ որպես լրագրող՝ ես ղեկավարվում եմ միայն խղճի թելադրանքով և ոչ մի պարգևատրում չեմ ստանում։
- Ձեզնից բացի, ընտրություններում դիտորդի դերում հանդես է եկել ավելի քան 100 մարդ: Ո՞ր երկրներից էին նրանք ժամանել:
— Այնտեղ քաղաքական գործիչներ չեն եղել, եղել են մի շարք դիտորդներ հասարակական կազմակերպություններից։ Ես այնտեղ դիտորդներ եմ տեսել Պակիստանից, Ֆրանսիայից, Ամերիկայից, Աբխազիայից, ինչը շատ հետաքրքիր է։
- Եվրամիությունը վերահսկե՞լ է Ձեր ուղևորությունը։
— Այդպես չէի ասի։ Իմ դեպքում ամեն ինչ շատ բնական է եղել, քանի որ ես Եվրախորհրդարանի արտաքին հարցերի հանձնաժողովի անդամ եմ և պաշտպանության ու անվտանգության հարցերով հանձնաժողովի նախագահի տեղակալ։ Իմ գործի բնույթը հակամարտության գոտիներ այցելելն է` դրանց մասին պատկերացում կազմելու համար։
- Սպասո՞ւմ էիք, որ Ադրբեջանը կհայտարարի Ձեր ձերբակալության մասին։
— Այո, ես ենթադրում էի, որ նման բան կարող է պատահել։ Դա պաշտոնական Բաքվի քարոզչության մի մասն է, որը սկսվել է մեկ ամիս առաջ, երբ Մինսկում ձերբակալվել է ռուս բլոգեր Լապշինը։ Ադրբեջանի ահաբեկման քաղաքականության մի մասն է։
- Դուք չե՞ք վախենում, որ Ձեզ կարող են հանձնել Ադրբեջանին։
— Ես Մինսկ չեմ գնա։
