ԵՐԵՎԱՆ, 3 մարտի — Sputnik. Ադրբեջանում պետական մակարդակով վարվող այլատյաց քաղաքականության մասին վկայող փաստերը բաց և հասանելի են համացանցում, տարբեր լրատվամիջոցների եթերում ու կայքերում: Այս մասին ՀՀ ՄԻՊ գասենյակում կազմակերպված քննարկմանը հայտարարեցին մի շարք փորձագետներ:
Արցախի մարդու իրավունքների պաշտպան Ռուբեն Մելիքյանը նշեց, որ ադրբեջանական լրատվամիջոցների հրապարակումներում կան տեսանյութեր, որտեղ ուսուցիչը դասի ժամանակ ատելություն է քարոզում դպրոցական երեխաներին: Իսկ 10-ամյա երեխան ժամերով պահվում է Բաքվի օդանավակայնում միայն այն պատճառով, որ հայի ազգանուն ունի: Դեպքերն այսքանով չեն սահմանափակվում:
Ներկաները հիշեցին ապրիլյան պատերազմի օրերին պետական ամենաբարձր մակարդակով տարվող հայատյաց քաղաքականությունը և թե ինչպես հայ սպայի գլուխը կտրած մարդասպանը հերոս հռչակվեց, իսկ Ադրբեջանի ՄԻՊ-ն ուսանողության հետ հանդիպմանը հայտարարեց, որ բոլոր ադրբեջանցի երիտասարդները պետք է դաստիարակվեն նրա օրինակով:
Ի դեպ, մասնագետների խոսքով, Ադրբեջանում նույն քաղաքականությունն է իրականացվում ոչ միայն հայերի, այլև այդ երկրում բնակվող բնիկ ժողովուրդների նկատմամբ: Դրա վառ օրինակը Հայաստանում ապաստանած Շահին Միրզոևն է, որը նույնպես ներկա էր քննարկմանը և պատմեց, թե ինչ վերաբերմունքի են արժանանում այդ երկրում իր ազգակիցները:
«Թալիշների համար հեռուստատեսությունն արգելված է, ռադիոն արգելված է: Եթե նախկինում թալիշերենի դեմ էին, հիմա արդեն թալիշական առոգանությունն են արգելում: ANS հեռուստաընկերության եթերում այդպիսի դեպք եղավ, երբ թալիշ երիտասարդին եթերում ասացին` նախ թալիշական առոգանությունդ վերացրու, հետո նոր եթեր արի»,- պատմեց Միրզոևը՝ նշելով, որ թալիշներով բնակեցված ադրբեջանական 9 շրջաններից 4-ում արդեն այս քաղաքականության հետևանքով թալիշերեն չեն խոսում:
«Ընդդեմ իրավական կամայականության» ՀԿ նախագահ, ՀՀ մարդու իրավունքների նախկին պաշտպան Լարիսա Ալավերդյանը նշեց, որ միջազգային հանրությունն արցախյան հիմնախնդիրն ու Ադրբեջանում ազգային փոքրամասնությունների խնդիրը պետք է դիտարկի հենց այլատյացության հարթության վրա:
«Միջազգային հանրությունն այդ շարժումները՝ արցախյան, թալիշների, լեզգիների, ուդիների, պետք է դիտարկի հենց որպես գաղութատիրական կարգերի դեմ պայքար»,- ասաց Ալավերդյանը:
Հակառակ տարվող այս քաղաքականությանը, միջազգային ատյաններում Ադրբեջանը ջանում է ներկայանալ որպես տոլերանտ երկիր, բայց, ինչպես նշվեց քննարկման ընթացքում, տարբեր երկրների համալսարաններում, գիտական կառույցներում Ադրբեջանի դիվանագիտական ներկայացուցչությունների միջոցով կազմակերպվում են դասախոսություններ, ֆիլմերի դիտումներ, որոնցում ներկայացվում է Ադրբեջանի մեկնաբանությունը հայ ժողովրդի և արցախյան հիմնահարցի վերաբերյալ:
ՀՀ մարդու իրավունքների պաշտպան Արման Թաթոյանի համոզմամբ` ադրբեջանական քարոզչությանը Հայաստանն ու Արցախը կարող են հակադրել մեկ հիմնական փաստ՝ կայացած ժողովրդավարական երկիր ԼՂՀ-ի գոյությունը:
«Մարդու իրավունքների տեսանկյունից կարող են բացվել դռներ և բացվում են: Պարզ օրինակը Արցախի ՄԻՊ-ի ասուլիսն էր Ստրասբուրգում, որը նաև ուղիղ եթերով էր հեռարձակվում: Սա աննախադեպ երևույթ էր: Հետևաբար, ես կարծում եմ` մենք ինքնուրույնության աստիճանով զարգացած երկիրը քաղաքակիրթ աշխարհին ցույց տալու խնդիր ունենք», — ասաց Թաթոյանը:
Արցախի անկախության ճանաչումը, Արմեն Թաթոյանի կարծիքով, պետք է սկսվի ժողովրդավարական ճանաչումից, որտեղ լուրջ հաջողություններ արձանագրելու շանսերը, պաշտպանի համոզմամբ, մեծ են:
