ԵՐԵՎԱՆ, 10 մարտի — Sputnik. Ստամբուլում ուղղաթիռի կործանման հետևանքով 7 մարդ է զոհվել, այս մասին հայտնում է ՌԻԱ Նովոստին` հղում անելով NTV հեռուստաընկերությանը, որը մեջբերում է Ստամբուլի քաղաքապետ Քադիր Թոփբաշի խոսքերը։
Eczacıbaşı ընկերությունների խմբին պատկանող Sikorsky S-76 ուղղաթիռը կործանվել է Ստամբուլի արվարձանում։ Մառախուղի պատճառով ուղղաթիռը բախվել է հեռուստատեսային աշտարակին։
Թուրքական ԶԼՄ-ների տվյալով` ուղղաթիռում եղել են օդաչուներ Ալադին Աջարն ու Ահմեդ Բուլուդը։ Նշվել են նաև զոհված ուղևորների անունները` VitrA-ի գլխավոր տնօրեն Սալիմ Օզենը, ռուսներ Ալեքսանդր Վանինը, Իգոր Կոչերգինը, Լյուդմիլա Չուպրովան և Ելենա Բադրագանը։ Ավելի վաղ Milliyet-ը հայտնել էր, որ օդաչուները հաճախ էին թռիչքներ իրականացնում այդ տարածքում և քաջածանոթ էին տեղանքին։ Պարբերականը հայտնում է, որ 257 մետրանոց հեռուստաաշտարակը նշված է եղել քարտեզում` որպես խոչընդոտ։
