ԵՐԵՎԱՆ, 13 մարտի — Sputnik, Լաուրա Սարգսյան. Հայաստանի համար բարենպաստ շրջանը սկսվում է մարտի 21-ից, երբ ամբողջ աշխարհը նոր աստղագուշակային տարվա է պատրաստվում։
«Այդ ամսաթիվը կայուն է և տարիների ընթացքում չի փոխվում։ Վեներան ու Հրե աքաղաղը հենց այդ օրվանից են «ստանձնում իրենց լիազորությունները», և նրանց էներգիան մենք կարող ենք լիովին զգալ», — Sputnik Արմենիայի թղթակցի հետ զրույցում ասաց էզոթերիկ-աստղաբան Գուրգեն Հովհաննիսյանը։
2017թ-ը Կարմիր (Հրե) աքաղաղի տարի է, իսկ աքաղաղը բավական ագրեսիվ արարած է։ Պայմանականորեն դա Վեներայի տարին է, այս տարի Երկրի վրա կգերիշխի նրա ազդեցությունը։
Սակայն այդ դրական կանխատեսման ֆոնին էզոթերիկը շտապում է նախազգուշացնել, որ մենք բարենպաստ աստղագուշական փուլի հետ մեկտեղ մտնում ենք խոցելի փուլ` նախընտրական շրջան։
Հենց այդ ժամանակ մենք պետք է միավորենք մեր ջանքերը, որպեսզի չենթարկվենք բացասական զգացմունքների և դեպրեսիայի ազդեցությանը։ Նա կոչ է անում բնակչությանը մեծ հույսեր չկապել ընտրությունների արդյունքների հետ, որպեսզի չհիասթափվեն և չկենտրոնանան բացասական երևույթների վրա, այլ նայեն դեպի ապագա և ապրեն ներկայով։ Պետք է հասկանալ, որ անցումային շրջաններում, երբ էներգիաների փոխակերպում է տեղի ունենում, մարդիկ առավել խոցելի են դառնում։ Այդ շրջանում պետք է կենտրոնանալ, բարոյապես և ֆիզիկապես նախապատրաստվել։
«Յուրաքանչյուր ամսաթիվ, իրադարձություն և երևույթ պետք է ընդունել առանց վախի և հուզմունքի։ Այդ ամենը պետք է դիտարկել ավելի լայն համատեքստում։ Եթե ես ասեմ, որ սեպտեմբերի 21-ին վատ է լինելու, ապա մենք բոլորս կսպասենք դրան և կպրոյեկտենք` դեպի մեզ ձգելով բացասական էներգիան», — ասաց Հովհաննիսյանը։
Աստղագետը կարծում է, որ բացասական երևույթները մեծ տեղ ունեն հայերի կյանքում։ Ուստի այսօր բնակչությունն ապրում է ոչ թե ներկայով, այլ անցյալով` իրողություններով, որոնք այլևս չկան մեր կյանքում։ Ցանկացած գործողություն, որը պրոյեկտվում է երևակայության մեջ, իր կողմ է ձգում այս կամ այն էներգիան, մտքերը հաճախ նյութականանում են։ Այդ պատճառով պետք է չկենտրոնանալ վատի վրա և ցանկացած երևույթի մեջ դրական կողմեր որոնել։
«Սնահավատ լինելը վատ է, թերի գիտելիքը միշտ ի վնաս մեզ է գործում։ Ամսաթվերն իսկապես կարևոր են, քանի որ մեր ծննդյան ամսաթիվը կանխորոշում է մեր բնավորությունը և ճակատագրի որոշակի գծերը։ Սակայն դրանք բառացի մի ընկալեք», — ասում է Հովհաննիսյանը։
Նա կարծում է, որ բացասական էներգիային դիմակայելու հարցում (այդ թվում` մեր հարևանների) բնակչությանը կարող են օգնել ոչ թե քաղաքական գործիչները, այլ մշակույթի և արվեստի գործիչները։
Աստղագուշակը նշում է, որ հաջորդ կարևոր ամսաթիվը լինելու է սեպտեմբերին` լուսնային և արևային խավարման շրջանում։
