ԵՐԵՎԱՆ, 14 մարտի — Sputnik. 2017 թվականի մարտի 15-ից 30-ը Հայաստանում Ֆրանսիայի դեսպանությունը կազմակերպում է Ֆրանկոֆոնիայի 15 օր տոնական միջոցառումների շարքը, որը կանցկացվի ողջ երկրում՝ ՀՀ արտգործնախարարության հովանու ներքո, իսկ, ընդհանուր առմամբ, այս տոնը նշվում է ողջ աշխարհում։
Այս մասին այսօր լրագրողների հետ հանդիպման ժամանակ ասել է ՀՀ-ում Ֆրանսիայի արտակարգ և լիազոր դեսպան Ժան-Ֆրանսուա Շարպանտիեն։
«Նշեմ, որ այս տարի մեզ է միացել 5 երկիր, որոնք իրենց գործուն մասնակցությունը կունենան։ Մասնակից երկրները մեկ ընդհանրություն ունեն՝ խթանում են ֆրանսերենի զարգացումը և միալեզու գլոբալիզացմանն առաջարկում են այլընտրանք»,- ասել է դեսպանը։
Ասուլիսի ընթացքում տեղեկացվել է, որ Ֆրանկոֆոնիայի օրերին հագեցած միջոցառումներ են սպասվում՝ ֆիլմերի ցուցադրություն, երաժշտություն, թատրոն, էկոնոմիկա և այլն։
Հարցին, թե ինչ հայկական կերակուր է սիրում Ժան-Ֆրանսուա Շարպանտիեն, և ինչ կառաջարկի հայերին, դեսպանն ասել է. «Ես շատ եմ սիրում հայկական սպաս, իսկ ֆրանսիական ուտելիքներից սիրում եմ բոլոր այն կերակրատեսակները, որոնք պատրաստվում են բադի մսով»։
