ԵՐԵՎԱՆ, 15 մարտի — Sputnik. Փաստաբանների պալատի շուրջ բարձրացած աղմուկին այսօր Sputnik Արմենիա մամուլի կենտրոնում անդրադարձան մի խումբ փաստաբաններ՝ վստահեցնելով, որ պալատում որևէ խնդիր իրականում չկա: Դրանք ոչ թե խժդժություններ են, այլ խժդժությունների իմիտացիա նշեց ասուլիսին ներկա «Կոնցեռն դիալոգ» փաստաբանական ընկերության տնօրեն Սեդրակ Ասատրյանը:
«Իրականում մեզ ամեն օր հարցնում են՝ ինչ է կատարվում Փաստաբանների պալատում: Ասեմ՝ փաստաբանների պալատում ոչ մի բան չի կատարվում: Նորմալ, ընթացիկ գործընթացներով առաջ ենք շարժվում: Փաստաբանների 99 տոկոսը նորմալ աշխատում են»,- լրագրողների հետ հանդիպմանն ասաց Սեդրակ Ասատրյանը:
Մնացած մեկ տոկոսն էլ, գործընկերների համոզմամբ, ինչ-ինչ դժգոհություններ ունի պալատի ղեկավարությունից, ինչի մասին պարբերաբար հրապարակավ հայտնում է: «K and P» փաստաբանական գրասենյակի գործընկեր, փաստաբան Թաթուլ Խուդատյանի համոզմամբ, նման հրապարակային հայտարարությունները, սակայն, առաջին հերթին վնասում են հենց իրենց՝ փաստաբանական համայնքի հեղինակությանը:
«Մեկ-երկու մամուլի ասուլիսով 1700-ից ավելի փաստաբանների կախվածության մասին հասարակության մեջ կարծրատիպի ստեղծելն առաջին հերթին հարվածում է հենց ամբողջ փաստաբանական ինստիտուտին»,- ասաց Խուդատյանը:
Անդրադառնալով փաստաբանական ներկայիս մեկ կառույցը մի քանի փասատաբանական պետական միավորումների բաժանելու խնդրին` փաստաբան Սեդրակ Ասատրյանը ասաց, որ դա ոչ միայն օգուտ չի տա փաստաբանական համայնքին, այլ հակառակը՝ կործանարար ազդեցություն կունենա հայաստանյան կայացած համակարգի համար:
«Տարածաշրջանում մենք լավագույն ու ամենաանկախ փաստաբանական համայնքն ենք»,- ասաց Ասատրյանը՝ կոչ անելով ստեղծված լավը չկործանել:
Իսկ «Հովհաննիսյան և գործընկերներ» ընկերության կառավարող գործընկեր, փաստաբան Հայկ Հովհաննիսյանը վստահ է, որ նույն կարգավիճակով ու առաքելությամբ մի քանի կառույցների առկայությունն առաջին հերթին կվնասի փաստաբանների անկախությանը: Կստեղծվեն «գրպանային» միավորումներ, որոնք առանձին-առանձին ներկայիս պալատի վարկանիշը չեն ունենա:
«Այս ուժեղ կառույցը, որի հետ այսօր հաշվի են նստում բոլոր պետական մարմինները, տրոհելը բավականին վտանգավոր նախաձեռնություն կարող է դառնալ: Այն պետական մարմիններին, որոնք չեն ցանկանում տեսնել անկախ, կայացած, ուժեղ փաստաբանական միավորում, որը կանգնած է իր անդամների շահերի պաշտպանության հիմքերում, կարող են և նպաստել տրոհմանը»,- ասաց նա:
Ինչ վերաբերում է գործընկերների հայտնած դժգոհություններին, ասուլիսին ներկա փաստաբանները չեն բացառում, որ դրանք կարող են ունենալ միանգամայն օբյեկտիվ հիմքեր, բայց վստահ են, որ ցանկացած խնդիր պետք է քննարկել ու փորձել լուծել նախ համայնքի ներսում: