ԵՐԵՎԱՆ, 14 մարտի — Sputnik. Հայաստանի նոր Ընտրական օրենսգիրքը բարձրացնում է ընտրությունների գործընթացի ժողովրդավարությունը, արդարությունը, չորեքշաբթի լրագրողներին ասաց ԱՊՀ Գործադիր կոմիտեի նախագահի առաջին տեղակալ Վիկտոր Գումինսկին։
Նրա խոսքով` մարտի 14-ին բացվել է ԱՊՀ Դիտորդների առաքելության շտաբը, նրանք հանդիպել են ԿԸՀ ղեկավար Տիգրան Մուկուչյանի հետ և ծանոթացել ընտրական օրենսգրքի նորարարություններին։
«Հայաստանի ԸՕ-ում կատարված փոփոխությունները հեղափոխական են, քանզի բարձրացնում են քաղաքացիների ընտրական իրավունքի ժողովրդավարությունը, բարձրացնում արդար մրցակցության երաշխիքները և ընդհանուր առմամբ ընտրական գործընթացի ժողովրդավարությունը», — ասաց Գումինսկին։
Նրա խոսքով` առաքելության կազմում ընդգրկված են ԱՊՀ երկրների, ԱՊՀ Գործադիր կոմիտեի և Բելառուսի ու Ռուսաստանի միության խորհրդարանական ժողովի 150-180 դիտորդներ, նրանցից 20-ը երկարաժամկետ դիտորդներն են։ Մնացածները կժամանեն ընտրություններից 2-4 օր առաջ։ Տվյալ պահին 76 դիտորդ` ՌԴ-ից, Բելառուսից, Թուրքմենստանից, Ուզբեկստանից և Ղազախստանից, հաստատել են իրենց մասնակցությունը։
Դիտորդների առաքելությունը կգլխավորի ԱՊՀ Գործկոմի նախագահ Սերգեյ Լեբեդևը։ Լեբեդևի մամուլի ասուլիսն ընտրությունների արդյունքների վերաբերյալ տեղի կունենա ապրիլի 3-ին` Հայաստանի ԿԸՀ ընտրությունների արդյունքների նախնական ամփոփումից հետո։
Գումինսկին «եղբայրական հայ ժողովրդին» մաղթել է կայունություն և զարգացում։
