ԵՐԵՎԱՆ, 16 մարտի – Sputnik. Գյումրիում արտասովոր իրարանցում էր: Բնակիչների հետ հանդիպման էր «Ծառուկյան» դաշինքի առաջնորդը:
Ծառուկյանին անձամբ տեսնելու ցանկությունը «Թատերական» հրապարակ էր բերել շատերին՝ ահելն ու ջահելը, հաշմանդամության խնդիր ունեցողն ու գործազուրկը, մարզիկն ու ուսանողը եկել էին թատերական հրապարակ: Շատերին հետաքրքիր չէր, թե ինչ ծրագիր է ներկայացնելու Ծառուկյանը, ավելի շատ անձամբ դաշինքի առաջնորդին տեսնելու ու ֆինանսական աջակցության խնդրանքով նամակ փոխանցելու ցանկությունն էր մեծ: Հումորասեր գյումրեցին զարմացավ ու նույնիսկ կատակեց` «Էս Գյումրիում ըսքա՞ն մարդ կա»:
Շատերի հավատն այն աստիճան խորն էր, որ նույնիսկ մաղթանքներն էին «աստվածային»: «Թող Աստված օգնի, որ Ծառուկյանն ընտրվի: Սուրբ հոգով ու Աստծո օգնությամբ եկել եմ Ծառուկյանի մոտ` խնդրանքով»,-Sputnik Արմենիայի հետ զրույցի ժամանակ նշեց հաշմանդամության երկրորդ կարգ ունեցող 58 տարեկան Ռիմա Գրիգորյանը: Տիկին Ռիման դրամական աջակցության խնդրանքով նամակներ էր բերել նաև իր ծանոթների անունից: Ի դեպ, նամակներն այնքան շատ էին, որ Ծառուկյանի օգնականները պարկերով դրանք հավաքեցին:
