ԵՐԵՎԱՆ, մարտի 20 — Sputnik. Իշխանության գալուն պես Հայաստանի Կոմունիստական կուսակցությունը պատրաստվում է պայքարել մարմնավաճառության դեմ և վերականգնել հասարակության բարոյական հիմքերը, երկուշաբթի լրագրողներին ասաց ԿԿ ՀԿԿ առաջին քարտուղար Տաճատ Սարգսյանը: Նրա խոսքով` խորհրդային տարիներին մարմնավաճառությունը հազվադեպ երևույթ էր և «թեթև վարքի կանանց ճանաչում էին բոլորը»:
«Ցավում եմ, որ նման երևույթը հիմա գրեթե զանգվածային բնույթ է կրում: Մեր հասարակության հիմքը ընտանիքն է: Որքան ընտանիքում խիստ լինի կարգապահությունը, այնքան խիստ կլինի նաև պետությունում», — ասաց Սարգսյանը:
Նրա խոսքով` կոմունիստները դրա դեմ պայքարելու են իրենց գաղափարախոսության և օրենքների միջոցով:
«Ես չեմ առաջարկում «կախել» նրանց, պետք է երիտասարդների հետ աշխատանքներ տանել և այնպիսի քաղաքականություն վարել, որ երկիրը հետզհետե հիմնովին մաքրվի» — ասաց Սարգսյանը:
Հայ կոմունիստների առաջնորդը նշեց, որ կոնկրետ «դեղատոմս» չունի նման երևույթների դեմ պայքարելու համար, բայց համոզված է, որ պետք է այդ չարիքի «քոքը կտրել»։
