ԵՐԵՎԱՆ, 22 մարտի — Sputnik, Լաուրա Սարգսյան. Հարյուրավոր հավատացյալներ Հայաստանում և սփյուռքում կհավաքվեն երեկոյան եկեղեցիներում և վանքերում` նշելու Միջինքը։
Հավատացյալները հավաքվում են եկեղեցական տաճարներում կամ միմյանց տուն այցելում։
«Հայկական եկեղեցին տոնում է Միջինքը կամ Մեծ պահքի 24-րդ օրը։ Միջինքը 48-օրանոց պասը երկու մասի է բաժանում», — Sputnik Արմենիայի թղթակցի հետ զրույցում ասաց Հայ առաքելական եկեղեցու Արարատյան թեմի հոգևոր խորհրդի անդամ Մարիամ Պողոսյանը։
Այդ օրը հավատացյալները կարող են իրենց մի փոքր ուրախություն թույլ տալ` չխախտելով պասի խիստ կանոնները։ Ուրախությունն էլ պետք է չափի մեջ լինի, քանի որ պահքը շարունակվում է և այն խախտել չի կարելի, սա վերաբերում է նաև կենդանական սննդի օգտագործմանը։
Ըստ ավանդույթի` ընտանիքի մեծերը պատրաստում են տոնական, բայց պասային գաթա, որը բաղարջ է կոչվում։ Գաթան համային առումով առանձնապես չի տարբերվում ավանդականից, միայն թե միջուկը պատրաստելու համար բուսական յուղ է օգտագործվում։
«Հնում գաթայի մեջ կոպեկ էին դնում։ Համարվում էր, որ տարին հաջող կլինի նրա համար, ում բաժին կընկնի մետաղադրամը։ Գաթան կտրատում էին ընտանիքի մեծերը` ամենակրտսեր անդամի մեջքին դնելով»,– ասաց Պողոսյանը։
Ավանդույթն անփոփոխ է մնացել նաև այսօր, սակայն արդեն մի քանի տարի է` գաթայի մեջ կոպեկի փոխարեն օրհնված խաչ են դնում։ Հայերն այնքան են սիրել այս նորամուծությունը, որ այժմ խաչն օգտագործում են նաև սփյուռքահայերը։ 48 օր տևողությամբ Մեծ պահքը կամ հոգևոր մաքրման շրջանը սկսվում է Բարեկենդանից։
Հավատացյալների համար այդ շրջանը սեփական գոյության վերաիմաստավորման, աղոթքի և մեղքերի թողության շրջան է։ Մեծ պահքն ավարտվում է Զատկի տոնով, որն այս տարի Հայ առաքելական եկեղեցին նշում է ապրիլի 16-ին։
