ԵՐԵՎԱՆ, 28 մարտի — Sputnik. Միայն փոխզիջումները կարող են արցախյան հարցի լուծմանը հանգեցնել, Sputnik Արմենիայի մամուլի կենտրոնում ասաց ՀՀ ԱԺ փոխխոսնակ
Էդուարդ Շարմազանովը։
«Մեր դիրքորոշումն Արցախի վերաբերյալ չի փոփոխվել։ Կան մի քանի կետեր, որոնք պետք է իրագործվեն։ Նախ` Արցախի վերջնական կարգավիճակը բացառապես Արցախի ժողովրդի որոշելիքն է: Մենք սատարելու ենք այս գործում Արցախի քաղաքացիներին ու այս կետով հետքայլ անհնար է», — ասաց Շարմազանովը։
Մյուս կողմից, իշխող կուսակցությունը սատարելու է ԵԱՀԿ Մինսկի խմբի խաղաղության հասնելու ջանքերին՝ երեք սկզբունքների հիման վրա լուծելու այս խնդիրը:
Բացի այդ, հայկական կողմն ամրացնելու է առաջնագիծը, միաժամանակ, քայլեր ձեռնարկելով Արցախը բանակցային սեղան վերադարձնելու համար: Առանց Արցախի մասնակցության խնդիրը չի լուծվի։
Ինչ վերաբերվում է Մադրիդյան փաստաթղթին, ապա դրանք ՀՀԿ-ի երազանքի փաստաթղթերը չեն, բայց հիմք են` նպատակներին հասնելու: «Մեր նպատակն է հասնել 1988 թվականի արդար դատի իրականացմանը»:
«Իսկ մենք լավ ենք հիշում, թե 1988-ին ինչ էին ցանկանում մեր հայրերը Երևանում եւ Ստեփանակերտում»։
Նրա խոսքով, բնականաբար, փոխզիջումներ պետք են, բայց դրանց մասին պետք է խոսենք այն ժամանակ, երբ Ադրբեջանը պատրաստ լինի գնալ փոխզիջումների: