ԵՐԵՎԱՆ, 2 ապրիլի — Sputnik. «Օհանյան-Րաֆֆի-Օսկանյան» դաշինքի առաջնորդներից մեկը` պաշտպանության նախկին նախարար Սեյրան Օհանյանն այսօր քվեարկել է հանուն Հայաստանի ազնիվ ու բարեկեցիկ ապագայի և զարգացած տնտեսության: Այս մասին Սեյրան Օհանյանը հայտնեց քվեարկությունից հետո, լրագրողների հետ զրույցում:
Նա նաև հույս հայտնեց, որ իշխանություններն ընտրակեղծարարության չեն դիմի: Իսկ հնարավոր հետընտրական զարգացումների մասին լրագրողների հարցերին արձագանքեց. «Տրամադրությունս մի՛ փչացրեք»:
Այդուհանդերձ, Սեյրան Օհանյանը հայտնեց, որ դաշինքն ընտրախախտումների հնարավոր դեպքերի մասին մտահոգիչ ահազանգեր ստացել է և այժմ զբաղվում է դրանցով:
«Ես ցանկանում եմ, որպեսզի խաղաղ լինի, հանդարտ լինի»,- ասաց Օհանյանը:
Քվեարկությունից հետո ՕՐՕ դաշինքը նախատեսում է այցելել Եռաբլուր` հարգանքի տուրք մատուցելու 2016 թվականի ապրիլի 2-ի զոհերի հիշատակին: «Այդ ամենից հետևություններ արվել են, բայց այդ հարցերը պետք է տալ Պաշտպանության նախարարությանը: Եկեք այնպես անենք, որ մեր մարտական ընկերների, իմ ծառայակից ընկերների հիշատակը արատավոր երևույթներով, հարցերով չստվերենք»,- ասաց Օհանյանը:
Օհանյանն ընտրատեղամաս էր այցելել կնոջ՝ Ռուզաննա Խաչատրյանի հետ։ Վերջինը նշեց, թե հույս ունի, որ ընտրությունները խաղաղ ընթացք ու ավարտ կունենան: