ԵՐԵՎԱՆ, 3 ապրիլի — Sputnik. Ռուսաստանը և Հայաստանը 25 տարվա ընթացքում կարողացան երկկողմ հարաբերությունները հասցնել դաշնակցային փոխգործակցության բարձր մակարդակի, գրված է Կրեմլի կայքում հրապարակած Ռուսաստանի նախագահ Վլադիմիր Պուտինի շնորհավորական հեռագրում։
«Սրտանց շնորհավորում եմ Ձեզ նշանավոր հոբելյանի` Ռուսաստանի դաշնության և Հայաստանի Հանրապետության միջև դիվանագիտական հարաբերությունների հաստատման 25-ամյա հոբելյանի առթիվ։ Անցած տարիների ընթացքում, հիմնվելով հայ և ռուս ժողովուրդներին վաղուց ի վեր կապող բարեկամության և փոխհարգանքի բարի ավանդույթների վրա, մենք կարողացանք հայ-ռուսական հարաբերությունները հասցնել դաշնակցային փոխգործակցության բարձր մակարդակի», — գրված է ուղերձում։ Պուտինն ընդգծել է, որ երկու պետությունների միջև դինամիկ կերպով զարգանում է քաղաքական երկխոսությունն ու իրականացվում են համատեղ մեծածավալ նախագծեր` առևտրատնտեսական, գիտատեխնիկական, հումանիտար և այլ ոլորտներում։
«Եվրասիական ինտեգրացիոն գործընթացներում մեր երկրների համատեղ մասնակցությունը, արդիական սպառնալիքներին և տարածաշրջանային անվտանգության մարտահրավերներին հակազդելուն ուղղված ջանքերի համակարգումը լավ արձագանք են ունենում», — կարծում է Պուտինը։
Նա ավելացրեց, որ վերջերս Մոսկվայում անցկացրած բանակցությունները թույլ տվեցին համատեղ աշխատանքի նոր, հեռանկարային ուղղություններ նախանշել։ «Համոզված եմ, որ հայ-ռուսական կապերի ամբողջ համալիրի հետագա ամրապնդումը` երկկողմանի հենքով, ինչպես նաև ԵԱՏՄ, ՀԱՊԿ, ԱՊՀ և այլ բազմակողմ կառույցների շրջանակներում, բխում է մեր ընդհանուր շահերից` նպաստելով Անդրկովկասում և, ընդհանուր առմամբ, եվրասիական տարածքում խաղաղության և կայունության ապահովմանը», — գրված է հաղորդագրությունում։ Պուտինը Հայաստանի եղբայրական ժողովրդին բարեկեցություն ու բարգավաճում է մաղթել։
