ԵՐԵՎԱՆ, 3 ապրիլի — Sputnik. Շիրակի մարզի դատախազությունն այս պահի դրությամբ ապրիլի 2-ի ԱԺ ընտրությունների հետ կապված ստացել է մոտ 50 տարաբնույթ նյութ, ընտրախախտումների վերաբերյալ քրեական բնույթի գործ հարուցված չէ: Այս մասին տեղեկացրեց Շիրակի մարզի դատախազ Կարեն Գաբրիելյանը:
«Այս պահի դրությամբ ունենք խախտումների վերաբերյալ մոտ 50 տարաբնույթ նախապատրաստվող նյութ, որոնց կապակցությամբ կատարվում են անհրաժեշտ ստուգողական և քննչական կամ այլ դատավարական գործողություններ»,- ասաց Շիրակի մարզի դատախազ Կարեն Գաբրիելյանը:
Նշենք, որ, ըստ պատասխանատուի, այս պահին չկան առերևույթ հանցագործության հատկանիշներ պարունակող նյութեր՝ քրեական գործեր հարուցելու համար:
«Այս պահին չկան, բայց կարող է նյութերի նախապատրաստման ընթացքում ձեռք բերենք, այդ ժամանակ քրեական գործ հարուցելու մասին որոշում կկայացվի»,- ավելացրեց Շիրակի մարզի դատախազը:
ՀՀ ԿԸՀ-ն արդեն ներկայացրել է ՀՀ տարածքում բացված բոլոր 2009 ընտրատեղամասերից ստացված նախնական տվյալները. ԱԺ կանցնի 4 ուժ` ՀՀԿ-ն, «Ծառուկյան» դաշինքը, «Ելք» դաշինքը և ՀՅԴ-ն։
