ԵՐԵՎԱՆ, 4 ապրիլի — Sputnik. ԱՊՀ մասնակից-պետությունների անվտանգության մարմինների և հետախուզական ծառայությունների ղեկավարները պայմանավորվել են շարունակել համագործակցությունը միջազգային ահաբեկչության դեմ պայքարում, հայտնում է ՌԴ արտաքին հետախուզության մամուլի բյուրոն:
Նման պայմանավորվածություն է ձեռք բերվել հետախուզական գործունեության հարցերին առնչվող Մոսկվայում տեղի ունեցած հերթական նիստի արդյունքում: Նիստն անցկացվել է ՌԴ արտաքին հետախուզության ծառայության ղեկավար Սերգեյ Նարիշկինի նախագահությամբ:
Նիստը, որը նվիրված էր Ալմա Աթայում «ԱՊՀ մասնակից-երկրների պետական անվտանգության մարմինների հետախուզական ծառայությունների համագործակցության հիմնական սկզբունքների մասին» համաձայնագրի ստորագրման 25-ամյակին, սկսվեց մեկ րոպե լռությամբ` ի հիշատակ Սանկտ Պետերբուրգի մետրոյում ահաբեկչության հետևանքով զոհվածների, որից հետո Նարիշկինն ընթերցեց ՌԴ նախագահի ողջույնի խոսքը ֆորումի մասնակիցներին:
«Մասնակիցները ընդգծեցին 25 տարի առաջ ստորագրած համաձայնագրի պատմական նշանակությունը: Համաձայնագրում նախանշված բազմակողմանի գործընկերության սկզբունքները թույլ են տալիս ամրապնդել ԱՊՀ դրական ինտեգրացիոն միտումներն ընդհանուր առմամբ: Փոխգործակցության հաջող համատեղ փորձը միջպետական հարաբերությունների այնպիսի նուրբ բնագավառում, ինչպիսին հետախուզությունն է, անդրադառնում է փոխադարձ վստահության ընդհանուր մակարդակի բարձրացման վրա: Ալմա Աթայում ստորագրած համաձայնագրի զարգացումն ու դրույթների կատարելագործումը դարձան միջպետական հարաբերությունների անբաժան տարր, ԱՊՀ մասնակից-երկրների անվտանգության ապահովման վստահելի գործիք»,- նշել են մամուլի բյուրոյում:
Վերջնական հուշագրում նիստի մասնակիցները հաստատել են իրենց մտադրությունը՝ շարունակել բազմակողմանի համագործակցությունը խորհրդակցության շրջանակներում:
«Որպես հիմնական սպառնալիք, որն առնչվում է ԱՊՀ բոլոր մասնակից-երկրների կենսական շահերի հետ, նշվել է միջազգային ահաբեկչությունը, կրոնական և քաղաքական ծայրահեղականությունը»,- ընդգծվել է նիստում:
Նիստի բացմանը ներկա են եղել ԱՊԿ գործադիր քարտուղար Ս.Լեբեդևը, ՌԴ անվտանգության խորհրդի քարտուղար Նիկոլայ Պատրուշևը, ՌԴ արտգործնախարար Սերգեյ Լավրովը, ԱԴԾ առաջին փոխտնօրեն Ս. Սմիրնովը: Ֆորումի մասնակիցների թվում էին նաև Ադրբեջանի, Հայաստանի, Բելառուսի, Ղազախստանի, Ղրղըզստանի, Թուրքմենստանի և Ուզբեկստանի հատուկ ծառայությունների ներկայացուցիչներ:
