ԵՐԵՎԱՆ, 4 ապրիլի — Sputnik. Ամերիկյան Սան Ֆրանցիսկոյում հայտնի քաղաքային կամրջի մոտ «Հայոց ցեղասպանություն 1915» գրությամբ պաստառ է տեղադրվել, հայտնում է NBC BayArea։ Պաստառը տեղադրվել է հայ համայնքի ջանքերով։
Պաստառը տեղադրվել է կամրջի արևելյան կողմում գտնվող թունելի մոտ, որը տանում է դեպի «Գանձերի կղզի» (Treasure Island)։ Բացի «Հայոց ցեղասպանություն 1915» գրությունից, նշված է նաև GenocideEducation.org կայքի հղումը։
«Հայերն այս պաստառով ուզում են ուշադրության կենտրոնում պահել Օսմանյան կայսրությունում մեկ դար առաջ սպանված 1,5 միլիոն զոհերի հարցին», — նշված է հեռուստաընկերության ներկայացրած նյութում։
Պաստառի համար վճարել են Սան Ֆրանցիսկոյի բազմահազարանոց հայ համայնքի ներկայացուցիչները։ Համայնքի առաջնորդ Ալեքս Բաստյանը նշել է. «Ես ուզում եմ, որ մարդիկ մտածեն այն մասին, թե ինչպես կարող են կանխել ցեղասպանությունը և ինչպես կարող են այդ հարցում ավելի տեղեկացված լինել»։
Նշենք, որ պաստառը տեղադրվում է երրորդ տարին անընդմեջ։