ԵՐԵՎԱՆ, 10 ապրիլի – Sputnik. Այսօր, ի տարբերություն իրենց ընտրված գործընկերների, խորհրդարան էին եկել հիմնականում նոր ԱԺ չանցած պատգամավորները։ Քվորում չապահոված նիստին ՀԱԿ խմբակցությունից ներկա էին խմբակցության ղեկավար Լևոն Զուրաբյանն ու քարտուղար Արամ Մանուկյանը։
Sputnik Արմենիայի հարցին, թե ինչ կկորցնի խորհրդարանը ի դեմս նոր ԱԺ-ում բացակայող ՀԱԿ-ի, ՀԱԿ խմբակցության ղեկավար Լևոն Զուրաբյանն ասաց.
«Մենք ԱԺ-ում միշտ ասել ենք ճշմարտությունը։ ԱԺ-ի ամբիոնն օգտագործել ենք բացառապես ճշմարտությունն ասելու համար։ Հիմա ես չեմ կարծում, որ ԱԺ-ում թողել են, որ մնան ճշմարտությունն ասողները։ Բարձր գոռացողներ կլինեն, պաշտոնյաներին սատկացնողներ, ոչնչացնողներ կլինեն, բայց ճշմարտություն ասող չի լինի»։
Իսկ ՀԱԿ-ը, նրա խոսքով, կշարունակի ճշմարտությունն ասել արդեն ԱԺ-ի պատերից դուրս։
Արտախորհրդարանական, թե խորհրդարանական, մեզ համար նշանակություն չունի, կարևորը սկզբունքներն են»- նշեց Լևոն Զուրաբյանը։
Իսկ ՀՀԿ խմբակցության անդամ Հովհաննես Սահակյանը, որը ՀՀԿ համամասնական ցուցակում զբաղեցրած տեղի հետևանքով կարող է նույնպես զրկվել ԱԺ մանդատից, ասաց, որ սպասում է հարազատ կուսակցության որոշմանը։
«Երբ որ պարզ կլինի, թե ով կլինի ԱԺ-ում, ով կգնա գործադիր, այն ժամանակ էլ կարող ենք հստակ ասել»,- ասաց նա՝ հավելելով, որ չի կարևորում, թե երկրի իշխանության որ ոլորտում կկարողանա իրացնել իր կարողությունները։
