ԵՐԵՎԱՆ, 17 ապրիլի — Sputnik. Պատրաստության մակարդակի գնահատման ընթացքում ներգրավված են 2 հազարից ավելի զինծառայողներ և շուրջ 500 միավոր զենք ու ռազմական տեխնիկա: Այս մասին տեղեկացնում են օկրուգի մամուլի ծառայությունից։
Զորամիավորման զինծառայողների կողմից ստուգարքների հանձնումը կտևի երեք շաբաթ և կանցկացվի երեք փուլով: Առաջին փուլում գնահատվելու է ռազմակայանի ամբողջ անձնակազմի մարտական պատրաստության մակարդակը, մարտական հերթապահության, օպերատիվ պատրաստության, զենքի ու ռազմական տեխնիկայի վիճակը, զինծառայողների բարոյահոգեբանական վիճակը, իրավակարգի և զինվորական կարգապահության պահպանումը:
Երկրորդ փուլում Գյումրիի և Երևանի զինվորական կայազորների մշտական տեղաբաշխման վայրերում զինծառայողները ստուգարքներ են հանձնելու ղեկավար փաստաթղթերի, կանոնադրությունների, անվտանգության պահանջների իմացության գծով և լուծելու են սիտուացիոն ու մարտավարական խնդիրներ:
Երրորդ փուլի ընթացքում գնահատվելու են ստորաբաժանումների պրակտիկ գործողությունները ծովի մակերևույթից 1,5 հազարից մինչև 2,2 հազար մետր բարձրության վրա գտնվող «Կամխուտ» և «Ալագյազ» բարձրլեռնային զորափորձարաններում ցերեկային ու գիշերային ժամերին:
Պարապմունքների ընթացքում զորամիավորման զինծառայողները կատարելու են թրթուրավոր և զրահատանկային տեխնիկայի վարման վարժանքներ, հրաձգություն: Նաև ռազմական օկրուգի հանձնաժողովը անձնակազմից նորմատիվներ է ընդունելու հատուկ, տեխնիկական, մարտավարական, շարային և ֆիզիկական պատրաստությունից, ռազմական տեղագրությունից և ռադիացիոն, քիմիական ու կենսաբանական պաշտպանությունից:
