ԵՐԵՎԱՆ, 17 ապրիլի — Sputnik. Խառը մարտերի մարզիկ 26-ամյա Էդուարդ Վարդանյանը վստահ է, որ լիովին կատարել է Ալեքսանդր Սարնավսկու հետ մենամարտի ծրագիրը և կշարունակի հանդես գալ ACB լիգայում։ Այս մասին նա ասել է MMANews կայքին տված հարցազրույցում։
Վարդանյանը խոստովանել է, որ Սարնավսկու հետ մենամարտի ժամանակ ուժեղ հարված է ստացել լյարդին։
«Չէի սպասում, որ նա այդքան վտանգավոր ոտքեր ունի։ Մտածում էինք, որ ոտքով հասցրած սովորական հարված է, բայց նա շատ ուժեղ պտտեց, ինչի պատճառով էլ զգայուն հատվածների կպավ»,- ասել է մարզիկը։
Վարդանյանը նշել է, որ մայիսից հետո պատրաստ է պայքարել ACB տիտղոսի համար։
«Կամ էլ ևս մի մարտ կունենամ, իսկ հետ թույլ կտան մենամարտել գոտու համար։ Կախված է նրանից, թե ինչպես կորոշի լիգայի ղեկավարությունը»,- ասել է նա։
Նախկինում նա փորձել է ստանալ այդ տիտղոսը, սակայն բախտը նրան չի ժպտացել։
Վարդանյանն ապրիլի 15-ին Մոսկվայում հաղթել էր Սարնավսկուն «խեղդելու» հնարք կիրառելով։
