ԵՐԵՎԱՆ, 18 ապրիլի — Sputnik. Թուրք օգտատերերն աշխատում են Հայոց ցեղասպանության մասին պատմող «Խոստում» ֆիլմի վարկանիշը իջեցնելու ուղղությամբ, հայտնում է The Hollywood Reporter-ը։
Տորոնտոյում ֆիլմի պրեմիերային ներկա գտնված պրոդյուսեր Մայք Մեդավոյը պատմել է, որ դիտումից հետո 900 հոգանոց դահլիճը ծափահարում էր, որից հետո, հանկարծակի, 100 հազար մարդ ֆիլմը չափազանց վատ են գնահատել։
«IMDb-ում կարող էին միայն պարզել, թե որտեղից այդ ձայները։ Դրանք Կանադայից չէին, այսինքն՝ այդ մարդիկ ներկա չեն եղել Տորոնտոյում»,- հայտնում է Մեդավոյը։
«Խոստում» ֆիլմի դեմ առցանց արշավը այնպիսի կայքերում է տարվում, ինչպիսին Incisozluk-ն է, որը 4chan անանուն ֆորումի նմանատիպն է։ Օգտատերերը կոչ են անում փչացնել ֆիլմի վարկանիշը IMDb-ում և YouTube-ում։ Պարբերականը օրինակ է բերում Incisozluk հաղորդագրություններից մեկը։
«Ժողովուրդ, Հոլիվուդը լիամետրաժ ֆիլմ է նկարահանում այսպես կոչված՝ Հայոց ցեղասպանության մասին և թրեյլերն արդեն 700 հազար դիտում է հավաքել։ Մենք պետք է դրա դեմն առնենք և շտապ»,- գրված է հաղորդագրության մեջ։
Ավելի ուշ օգտատերը բավարարվածությամբ նշել է, որ ֆիլմը արագ սկսել է բացասական արձագանքներ հավաքել, և IMDb —ում գնահատականները հասել են 1,8 աստղի։
Ինչպես The Hollywood Reporter պարբերականին հայտնել է պրոդյուսեր Էրիկ Իսրայելյանը, Տորոնտոյի կինոփառատոնին պրեմիերայից հետո ֆիլմի մասին արձագանքները տարբեր էին, սակայն ամենամեծ դժվարությունը, որի հետ բախվեցին նախագծի ստեղծողները վարձակալին փնտրելիս, այն էր, որ հայերի ցեղասպանությունը մինչ օրս վիճելի թեմա է մնում։
«Այն դեպքում, երբ 28 երկիր, ինչպես նաև Ամերիկայի 50 նահանգներից 45-ը, ճանաչել է ցեղասպանությունը, Թուրքիան և Ադրբեջանը շարունակում են պահպանել այն մերժելու քաղաքականությունը։ Ավելին` տնտեսական և դիվանագիտական ճնշում են գործադրում (ընդհուպ մինչև սպառնալիքներ) նրանց վրա, ովքեր իրենց տեսակետը չեն կիսում։ Քաղաքական ճնշումների պատճառով ակնհայտ դարձավ, որ Թուրքիայի կառավարությունը կփորձի ազդել ֆիլմի առաջխաղացման վրա»,- ասաց նա։
Նրա խոսքով` ամերիկյան իրողության զավեշտալի կողմերից մեկն այն է, որ արտասահմանյան կառավարությունները կարող են վերահսկել արվեստը։
«Ամենաբարձր մակարդակում, տարբեր ստուդիաներում, մեզ ասում էին՝ կարևոր չէ, թե որքան լավն է ձեր ֆիլմը, որոշ ընկերություններ երբեք այն վարձույթի չեն հանի։ Սա խայտառակ իրականություն է»,- հայտնել է պրոդյուսերը։
«Խոստում» ֆիլմը ստեղծվել է ամերիկահայ միլիարդատեր Քրք Քրքորյանի ֆինանսական աջակցությամբ։ Ֆիլմի հեղինակը «Հյուրանոց «Ռուանդա»» ֆիլմի ռեժիսոր Թերի Ջորջն է, գլխավոր դերերում հանդես են եկել Օսկար Այզեքը, Քրիստիան Բեյլը և Շարլոտ լե Բոնը։ Գործողությունները զարգանում են Օսմանյան կայսրությունում՝ Հայոց ցեղասպանության ժամանակ։ Ֆիլմի պրեմիերան տեղի կունենա ապրիլի 21-ին։ Հայաստանում և Ռուսաստանում այն կցուցադրվի ապրիլի 27-ին։
«Խոստում ֆիլմի պրոդյուսերները սկսել են #keepthepromise (պահիր խոստումը) արշավը, որի միջոցով ֆիլմին իրենց աջակցությունն են հայտնել երաժիշտ Էլթոն Ջոնը, դերասան Սիլվեստր Ստալոնեն, երգչուհի Շերը, Բարբարա Սթրեյզանդը, դերասաններ Լեոնարդո ԴիԿապրիոն, Դին Քեյնը և Օուեն Ուիլսոնը:
