ԵՐԵՎԱՆ, 20 ապրիլի — Sputnik. Անցնող մեկ տարվա ընթացքում Հայաստանի 22 հասարակական կազմակերպություն ամերիկյան NED-ից (Ազգային ժողովրդավարական հիմնադրամ) և EED (Եվրոպական ժողովրդավարական հիմնադրամ) 1 241 714 դոլար գրանտ է ստացել: Այդ մասին այսօր հայտնեցին «Միջազգային հումանիտար զարգացման» ՀԿ անդամները՝ նման ֆինանսավորումը Հայաստանի ազգային շահի համար վտանգավոր որակելով:
«Մենք կարծում ենք, որ դա քաղաքական պատվեր է: Այդ պատվերը տրվում է մի կենտրոնից։ Այդ ՀԿ-ները հայտնվում են փողոցում, կարծես թե, պաշտպանելով ակտիվիստների շահերը, բայց այնպես է ստացվում, որ բոլոր ՀԿ-ները, որոնք մեր ցանկում կան, հանդս են գալիս մի հայտարարությամբ, մի ճակատով»,- ասաց «Միջազգային հումանիտար զարգացման» ՀԿ նախագահ Արման Ղուկասյանը։
Արման Ղուկասյանի համոզմամբ՝ Արևմուտքից տրվող գրանտները Հայաստանում ազգային շահին չեն ծառայում: Այդ գրանտների արդյունքը, նրա խոսքով, գունավոր հեղափոխություններն են:
Կատարված հետազոտության համաձայն, արևմտյան հիմնադրամներից 2016 թ.-ին 60 660 դոլար ստացել է «Հելսինկյան ասոցիացիան՝ Հայաստանում մարդու իրավունքների վիճակի դիտարկման համար, 91 380 դոլար՝ «Լրագրողների անկախ ցանց» ՀԿ-ն՝ Հայաստանի և Ադրբեջանի միջև երկխոսության վերլուծության, 49636 դոլար՝ «Թրանսփարենսի ինթերնեյշնլ հակակոռուպցիոն կենտրոնը»՝ ԱԺ ընտրությունները դիտարկելու համար և այլն:
Ասուլիսին ներկա էր նաև «Իրազեկ քաղաքացիների միավորում» ՀԿ ներկայացուցիչ Գևորգ Ղահրամանյանը, որը ներկայացրեց, թե ինչ կարգով է իրենց կազմակերպությունը դրամաշնորհ ստանում:
«ՀԿ խորհուրդը հրավիրում է քննարկում, որի արդյունքում որոշվում է, թե ինչ գրանտային ծրագիր մշակենք ու ում դիմենք, դրանից հետո միայն խորհուրդը հաստատում է ծրագիրն ու ներկայացում ազգային ժողովրդավարական կամ որևէ այլ հիմնադրամ: Դուք այնպես եք խոսում, կարծես այդ NED-ն իր ծրագիրն ուղարկում է մեզ, մենք էլ պարտադրված կատարում ենք»,- ասաց Գևորգ Ղահրամանյանը:
Ինչ վերաբերում է քաղաքական գործունեության մասին հնչած մեղադրանքին, «Իրազեկ քաղաքացիների միավորում» ՀԿ ներկայացուցիչը հերքեց այդ տեսակետը՝ հայտարարելով, որ իրենց դրամաշնորհային ծրագրերն իրականացվում են բացառապես անկախ փորձագետների մասնակցությամբ:
Ասուլիսի բանախոսները, սակայն, վստահ են՝ արևմտյան դրամաշնորհները քաղաքական նպատակ են հետապնդում:
«Մեր գլխավոր նպատակն այն չէ, որ եվրոպական հիմնադրամները դրամաշնորհներ չտան, այլ այն, որ չտան դրամաշնորհներ քաղաքական խնդիրների լուծման համար, որովհետև ՀԿ-ն և քաղաքականությունը տարբեր բաներ են, ՀԿ-ն պետք է չմտնի քաղաքական դաշտ»,- ասաց Արման Ղուկասյանը:
Որպես զեկույցում նշված խնդիրների լուծում «Միջազգային հումանիտար զարգացման» ՀԿ անդամները որոշել են դիմել կառավարությանն ու ԱԺ-ին՝ ՀԿ-ների մասին օրենքը վերանայելու և օտարերկրյա դրամաշնորհների նպատակները վերահսկելու մասին որոշում ընդունելու առաջարկով:
