ԵՐԵՎԱՆ, 25 ապրիլի — Sputnik. Կիպրահայ Հարություն Թահմազյանը և արգենտինահայ Ավո Թոքատլյանը Համահայկական համաշխարհային գործկոմի անդամներ են։ Ցեղասպանության 102-րդ տարելիցի կապակցությամբ այցելել են Հայաստան՝ Ծիծեռնակաբերդում հարգանքի տուրք մատուցել։
Ավո Թոքատլյանը հիշեցրեց, որ Արգենտինան առաջիններից է, որ ճանաչել է հայոց ցեղասպանությունը։
Նրա խոսքով՝ դժվար է հայապահպանության գործը, քանի որ արդեն 4-րդ սերունդն է մեծանում օտար հողում, որն ակամա ձուլվում է։ Նրանք, սակայն, շատ մեծ աշխատանք են տանում, որպեսզի երիտասարդները հիշեն իրենց արմատների մասին։ Հայապահպանությանն ուղղված միջոցառումներից մեկն էլ Արգենտինայում Հայոց ցեղասպանության տարելիցը նշելն է, որին մեծ թվով հայեր են մասնակցում։
Հարություն Թահմազյանն էլ նշում է, որ հույները շատ լավ են հասկանում հայերի ցավը, նրանք նույնպես տուժել են թուրքերից։ Կողք կողքի բարեկամաբար ապրող երկու ժողովուրդներն ընդհանուր շատ բան ունեն։ Ավելին, ցեղասպանության ժխտումն այնտեղ քրեական պատիժ է նախատեսում։
Թահմազյանն ու Թոքատլյանը վստահեցնում են, որ ահռելի աշխատանք են կատարում, բայց անելիք դեռ շատ կա, և հայրենիքի աջակցության կարիքն ունեն հայապահպանության գործում։
