ԵՐԵՎԱՆ, 25 ապրիլի — Sputnik. Առևտրի կենտրոնների 5 աշխատակիցները, որոնք բանակցում էին Պետեկամուտների կոմիտեի ներկայացուցիչների հետ, զրույցի արդյունքից գոհացած` դուրս եկան կառավարության շենքի դիմաց բողոքի ցույց կազմակերպած գործընկերների մոտ։
Կառավարության շենքի դիմաց նրանք բողոքի առաջին ցույցը կազմակերպվել էր չորս օր առաջ` ապրիլի 21-ին։ Վաճառողները դժգոհում են, որ հարկային ճնշման են ենթարկվում և տեսուչները հավելյալ փաստաթղեր են պահանջում իրենցից, իսկ երբ այդ փաստաթղթերը չեն ներկայացնում, տուգանվում են։ Իսկ վաճառողները վստահեցնում են, որ այդ փաստաթղթերը պետք է ներկայացնեն մաքսային մարմինները, ոչ թե իրենք։ Առաջին ցույցից հետո նրանց ընդունել էր վարչապետի օգնական Հայկ Զուրաբյանը։
Այսօրվա ցույցի մասնակիցներին ընդունեցին Պետեկամուտների կոմիտեի ներկայացուցիչները։ Հինգ հոգուց բաղկացած պատվիրակության անդամներից մեկը` Գագիկը Դանիելյանը, նշեց, որ գոհ են հանդիպումից, որովհետև իրենց առաջարկները լսեցին։
«Այսօրվանից շուկայի աշխատողներին «չեն նեղացնի», բայց հարկային տեսուչները կշարունակեն աշխատել շուկաների տարածքում։ Հիմա մենք պիտի ներկայացուցչական խումբ կազմենք, որում ընդգրկված կլինեն իրավաբաններ, տնտեսագետներ և այլ մասնագետներ։ Մենք կկազմենք մեր առաջարկները, կներկայացնենք կառավարությանը և միասին կուսումնասիրենք։ Նրանք էլ են ուզում (պաշտոնյաները — խմբ.), որ ժողովրդի մոտ ամեն ինչ լավ լինի»,- նշեց նա։
Դանիելյանի խոսքով` օրենքի այն նախագիծը, որն առաջարկում են շուկաների աշխատակիցները, տրամաբանական է, սակայն ժամանակ ու լրամշակում է պահանջում։
«Կարելի է հանգիստ շարունակել աշխատանքը։ Հանձնաժողովի անդամների անունից եմ ասում` մինչև 2019 թվականը հարկերի շեմը նույնը կմնա` 115 միլիոն դրամ»,- ասաց Դանիելյանը։
Ապրիլի 21-ին կազմակերպված բողոքի ցույցի ժամանակ առևտրականները վարչապետ Կարեն Կարապետյանի հետ հանդիպում էին պահանջում` բարձրաձայնելով իրենց առաջարկները։ Նրանց հիմնական պահանջը «մեկ պատուհան» սկզբունքով աշխատելն էր։ Ասում էին` ուզում ենք ներկրվող ապրանքի համար 1.5 տոկոսը վճարել մաքսակետում և հանգիստ գնանք աշխատելու:
