ԵՐԵՎԱՆ, 28 ապրիլի — Sputnik. Երևանի պետական բժշկական համալասարանի ռեկտոր Արմեն Մուրադյանի հրավերով Հայաստանում գտնվող Հորդանանի արքայադուստր Դինա Մայրեդն այսօր Երևանի պետական բժշկական համալսարանի պատվավոր դոկտորի կոչման արժանացավ։
«Քաղցկեղի դեմ պայքարի բանաձևերից մեկը ճիշտ մոտեցումն է, մեծ համբերությունը, անսահման սերը, որը մենք պետք է տանք հիվանդեներին։ Տիկին Մայրեդն ինքը հաղթահարել է որդու հիվանդությունը և այսօր հպարտությամբ ասում է, որ դա իր ընտանիքի մի էջն է եղել»,- ասաց ԵՊԲՀ ռեկտոր Արմեն Մուրադյանը։
Նրա խոսքով` արքայադուստրը հիվանդանոցների մանկական բաժանմունքներում ոգևորել է ծնողներին, պատմել իր ապրումների ու անցած ճանապարհի մասին` վստահեցնելով, որ քաղցկեղը հնարավոր է հաղթահարել ու շրջել կյանքի այդ էջը։
«Գիտխորհրդի որոշմամբ` տիկին Մայրեդին ԵՊԲՀ պատվավոր դոկտորի կոչում է շնորհվում»,- ասաց Մուրադյանը։
Հորդանանի արքայադուստր Դինա Մայրեդը Քաղցկեղի վերահսկման միջազգային միության (UICC) նորընտիր նախագահն է։ Նրա այցը Հայաստան կնպաստի մեր երկրի ուռուցքաբանական կազմակերպությունների (Ուռուցքաբանության Ազգային Կենտրոն, ԵՊԲՀ «Մուրացան» հիվանդանոցային համալիրի Քիմիաթերապիայի կլինիկա և այլն) ներգրավմանը աշխարհի խոշորագույն քաղցկեղի միությանը, որն էլ իր հերթին կնպաստի մեր երկրում ուռուցքաբանության զարգացմանը:
Արքայադուստր Դինա Մայրեդը երկար տարիներ ղեկավարել է Հուսեին Թագավորի Քաղցկեղի Հիմնադրամը և մեծապես նպաստել է Հորդանանում ուռուցքաբանության զարգացմանը։
