ԵՐԵՎԱՆ, 30 ապրիլի — Sputnik. Ամերիկացի կինոռեժիսոր և սցենարիստ Օլիվեր Սթոունը Sydney Morning Herald-ին հայտնել է, որ Ռուսաստանի նախագահ Վլադիմիր Պուտինի մասին ֆիլմ է նկարահանում:
«Պարոն Պուտինն աշխարհի ամենակարևոր առաջնորդներից է, և քանի որ ԱՄՆ-ն նրան թշնամի է հայտարարել, ընդ որում՝ հզոր թշնամի, ես կարծում եմ՝ կարևոր է նաև նրա կարծիքը լսել»,- ասել է Սթոունը:
Ռեժիսորի խոսքով՝ ֆիլմը ոչ այնքան վավերագրական է, որքան հարց ու պատասխանի ձևաչափով զրույց: Նկարահանող խումբը երկու տարվա ընթացքում չորս անգամ հանդիպել է Պուտինի հետ:
«Ֆիլմը բացահայտում է այն աշխարհայացքը, որին մենք՝ ամերիկացիներս, ծանոթ չենք»,- ասել է ռեժիսորը:
Ավելի վաղ Սթոունն ակտիվ մասնակցություն է ունեցել «Ուկրաինան կրակի մեջ» ֆիլմի ստեղծման աշխատանքին. նա հարցազրույց է վերցրել Ռուսաստանի նախագահ Վլադիմիր Պուտինից և Ուկրաինայի նախագահ Վիկտոր Յանուկովիչից:
Սթոունը հայտնի է որպես քաղաքական սուր թեմաներ արծարծող ֆիլմերի ռեժիսոր, նրա հերոսներն են եղել նախագահ Ռիչարդ Նիքսոնը, Ջոն Քենեդին, Ջորջ Բուշ-կրտսերը: Բացի այս, ֆիլմ է նկարահանել ԱՄՆ հատուկ ծառայությունների նախկին գործակալ Էդվարդ Սնոուդենի մասին:
