ԵՐԵՎԱՆ, 1 մայիսի — Sputnik. «Երևանյան գավաթ 4» սիրողական հեծանվասպորտի երևանյան չորրորդ մրցաշարի ամենատարեց հեծանվորդը Ագրարային համալսարանի դասախոս էր։
Մրցաշարն անցկացվեց ՀՀ սպորտի և երիտասարդության հարցերի նախարարության աջակցությամբ, Սիրողական հեծանվասպորտի և հեծանվային զբոսաշրջության ֆեդերացիայի նախաձեռնությամբ։
«Սիրողական հեծանվասպորտի և հեծանվային զբոսաշրջության ֆեդերացիան լրջորեն զբաղվում է ոչ պրոֆեսիոնալ մրցաշարերի կազմակերպմամբ։ Այսօր հերթական, տոնական մրցաշարն է, որին մասնակցում են բոլոր ցանկացողները»,- ասաց ֆեդերացիայի հիմնադիր և ղեկավար Արման Անտոնյանը։
Նա հայտնեց, որ մրցաշարին մասնակցել է 50 հեծանվորդ, որոնք հաղթահարել են 8 կմ տարածություն։ Մասնակիցների թվում եղել են և՛ մեծահասակներ, և՛ երիտասարդներ։ Իգական սեռի ներկայացուցիչներն առանձին են մասնակցել։
Ամենատարեց մասնակիցը 65-ամյա Օլեգ Քամալյանն էր։
«Արդեն երկու տարի է` մասնակցում եմ բոլոր միջոցառումներին։ Նարդի չեմ խաղում, չեմ խմում, հետևում եմ առողջ ապրելակերպի կանոններին։ Ամեն շաբաթ-կիրակի անպայման հեծանիվ եմ վարում, փորձում եմ լավ մարզավիճակում մնալ»,- ասաց նա։
Թեև Քամալյանը չէր կարողացել առաջ անցնել երիտասարդներից, այդուհանդերձ նա գոհ էր իր արդյունքից։
Մրցաշարի հաղթողը գավաթ և հեծանվորդների համար նախատեսված տարբեր աքսեսուարներ կստանա։
