ԵՐԵՎԱՆ, 2 մայիսի — Sputnik. «Հայաստան — Թուրքիա. ներդրողների հանդիպում» միջոցառման շրջանակում Երևանում հանդիպեցին ներդրողներ` աշխարհի տարբեր երկրներից։
Եվրոպական խորհրդի պատվիրակության համագործակցության բաժնի ղեկավար Խոա-Բինն Աճեմյանի խոսքով` Եվրոպան օրինակ է ծառայում տնտեսական փոխներգործության հիման վրա խաղաղ ապագա կառուցելու հարցում։
«Եվրոպան խաղաղության նախագիծ է, դա ավելին է, քաղ ուղղակի տնտեսական ինտեգրացում։ Այդ տեսակետից այն հաջողված նախագիծ է»։ «Հայաստան —Թուրքիա. ներդրողների հանդիպումը» կնպաստի տնտեսական ինտեգրմանը։ Խաղաղությունը տարածաշրջանում կառուցվելու է դե-ֆակտո համաձայնության վրա, մարդիկ պետք է տեսնեն հնարավորությունը, իսկ համատեղ ներդրումների ուղղություններ երկու երկրներում էլ շատ կան», — ասաց Աճեմյանը։
Նրա խոսքով` մարդիկ պետք է տեսնեն հնարավորությունները, կիսեն շահերը, պաշարները, ընդհանուր ապագա ունենան։ Միայն այս դեպքում է հնարավոր խաղաղ տարածաշրջան ստեղծել։
Իսկ Ֆրանսիայի դեսպան Ժան-Ֆրանսուա Շարպանտիեի խոսքը հայերեն լեզվով էր։ Նա նշեց, որ սա բացառիկ հնարավորություն է երկու երկրների ներդրողների և գործարարների փոխշահավետ համագործակցություն համար։
Ֆրանսիայի դեսպանը ընդգծեց, որ այժմյան հայ-թուրքական հարաբերությունները խանգարում են Հայաստանի զարգացմանը և նման միջոցառումներն անհրաժեշտ են երկրների միջև երկխոսություն հաստատելու համար։
«Հայաստանի ու Թուրքիայի չեղած հարաբերությունները մեծ խնդիր են ստեղծում Հայաստանի տնտեսական զարգացման հարցում։ Պետք է շարունակել աշխատել այդ ուղղությամբ, Ֆրանսիայի համար սա տարածաշրջանում կարևորագույն հարցերից է։
"Angel Labs"-ի համահիմնադիր Թուգջե Էրգյուլը նշեց, որ պետք է օգնել բիզնես-հրեշտակների (մասնավոր վենչուրային ներդրող, որն ապահովում է ընկերությունների ֆինանսական և փորձագետային սատարումը զարգացման վաղ փուլերում) «էկոհամակարգի» ձևավորմանը։
«Միջոցառման նպատակն է օգնել վենչուրային կապիտալի, «հրեշտակային» ներդրումների և թուրքական և հայկական բիզնես-հրեշտակների միջև երկխոսության ձևավորմանը, որպեսզի հնարավոր լինի մեկնարկել առաջին հայ-թուրքական «հրեշտակային» ներդրումային ցանցը», — ասաց Էրգյուլը։
Միջոցառման կազմակերպիչներն էին Հանրային լրագրության ակումբը Հայաստանում և Թուրքիայի տնտեսական քաղաքականության հետազոտությունների հիմնադրամը։
