ԵՐԵՎԱՆ, 2 մայիսի — Sputnik. Օլիմպիական կրկնակի չեմպիոն, սուսերամարտիկ Յանա Եգորյանը Instagram-ում, ուղիղ հեռարձակման ձևաչափով պատասխանել է իրեն ուղղված հարցերին` նշելով, որ Հայաստան գալը դեռ հարցականի տակ է։
Եգորյանի խոսքով` դեռ չգիտի` երբ կկարողանա պատմական հայրենիք գալ, բայց ողջունում է իր հայ երկրպագուներին։
«Ողջունում եմ բոլոր հայերին ու հայ երկրպագուներիս, որոնք հետևում են հաղթանակներիս և պարտություններիս։ Բոլորին բարև», — ասաց մարզիկը ։
Եգորյանը պատասխանեց նաև այն հարցին, թե որն է աղջկա հաջողության գաղտնիքը։ Ըստ նրա` հաջողակ աղջիկն առաջին հերթին պետք է սիրի ինքն իրեն` անկախ նրանից, թե ինքն ինչպիսին է։
Նա խոսեց նաև իր նախասիրությունների մասին։
«Սիրում եմ երգել։ Բայց երգում եմ միայն այն ժամանակ, երբ կողքս եղած մարդկանցից ոչ ոք երգել չգիտի, երգել իմացողներից ամաչում եմ։ Բացի այդ, սիրում եմ պարել, պաշտում եմ կատուներին, շներին»,- ասաց մարզիկը` պատասխանելով Sputnik Արմենիայի հարցին։
Հագուստի հարցում էլ նախընտրում է կանացի ոճը։
«Սպորտային հագուստ չեմ սիրում։ Գրեթե միշտ դա է հագիս։ Ես սիրում եմ բարձրակրունկ կոշիկներ, շրջազգեստներ, դա ինձ ավելի հոգեհարազատ է»,- ասաց նա։
Հետո ավելացրեց` սպորտն իր կյանքում ամենակարևորը չէ, շատ ավելի կարևոր է ընտանիքը։
Իսկ վերջում խոսեց երազանքների մասին, ասաց, որ երազում է երկու ոսկե մեդալ նվաճել 2020 թ-ին Տոկիոյում կայանալիք Օլիմպիական խաղերում։
