ԵՐԵՎԱՆ, 3 մայիսի — Sputnik. Լեռնային Ղարաբաղ այցելելուց հետո հայտնի հեռուստահաղորդավար, ՌԴ քաղաքացի Ռոման Բաբայանն ու քաղաքական, հասարակական և մշակութային այլ գործիչներ հայտնվել են Ադրբեջանի «սև ցուցակում»։
«Բաքվեցի համադասարանցիներս հայտնեցին, որ իմ մասին խոսել են լրատվական բոլոր հաղորդումներում և ասել, որ ես շատ վատ քայլ եմ արել, երբ առանց Ադրբեջանի թույլտվության այցելել եմ Ղարաբաղ», — Sputnik Արմենիա մուլտիմեդիոն մամուլի կենտրոնում կայացած ասուլիսի ժամանակ ասաց Բաբայանը։
Ըստ նրա` այդ ամենն անհեթեթություն է, որովհետև մինչ այդ էլ նա չէր կարողանում Ադրբեջան մեկնել` անգամ որպես ռուսական հեռուստատեսության թղթակից։ Առաջին անգամ Ռոմանը փորձել է Ադրբեջան մուտք գործել Ռուսաստանի Դաշնության խորհրդի խոսնակ Վլադիմիր Շումեյկոյի հետ, երկրորդ և երրորդ անգամները` Ռուսաստանի պաշտպանության նախարար Պավել Սերգեյի Գրաչևի հետ, չորրորդ անգամ` որպես նախագահ Վլադիմիր Պուտինի կնոջ` Լյուդմիլայի մամուլի խմբի անդամ։
«Եվ ամեն անգամ ուղևորության նախապատրաստական փուլում ադրբեջանական դեսպանատնից գրություն էինք ստանում այն մասին, որ նրանք իմ անվտանգությունը չեն երաշխավորում», — ասաց Բաբայանը։
Նրան մեկ անգամ է հաջողվել վայրէջք կատարել Բաքվում, երբ Քաբուլից Մոսկվա ուղևորվող ինքնաթիռը վայրէջք է կատարել Ադրբեջանում լրացուցիչ լիցքավորման համար։ Բաբայանը խոստովանեց, որ եթե նախօրոք իմանար այդ մասին, անկասկած չէր մեկնի այդ չվերթով։
Ըստ հաղորդավարի` իրեն չի հետաքրքրում Բաքվի «սև ցուցակն» ու այն փաստը, որ իր անունը հայտնվել է այնտեղ։
Հեռուստահաղորդավարը նշեց, որ մեծ տպավորություններ է ստացել Ղարաբաղ կատարած այցից, որտեղ հանդիպումներ է ունեցել բարձրաստիճան պաշտոնյաների հետ։ Նրան անչափ դուր է եկել ղարաբաղցիների լավատեսությունը, որոնք շարունակում են տներ կառուցել ու շենացնել իրենց երկիրը։
