ԵՐԵՎԱՆ, 4 մայիսի — Sputnik. ՀՀ-ում և այլ պետություններում ավտոմոբիլային տրանսպորտով կաբոտաժային բեռնափոխադրումներն արգելվում են։ Սա գործող կարգն է, որը կոչված է կատարելու Հայաստանի և այլ պետությունների միջև տրանսպորտի ոլորտում կնքված միջազգային համաձայնագրերի պահանջները։
Սա այն դեպքում, երբ Հայաստանը ԵԱՏՄ անդամ է, իսկ միությանն անդամակցելուց հետո տրանսպորտային քաղաքականության կարևոր ուղղություններից մեկն անդամ-պետությունների տարածքում կաբոտաժային փոխադրումների ազատականացումն է։
Տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանի ներկայացրած որոշման նախագծով` գործող կարգը փոփոխության կենթարկվի։ Միջպետական բեռնափոխադրում կատարելուց հետո Հայաստանում հաշվառված բեռնափոխադրողներն անդամ-պետության տարածքում կարող են իրականացնել մեկ կաբոտաժային բեռնափոխադրում։ Սրա շնորհիվ կկրճատվի միջազգային բեռնափոխադրման ծախսը, իսկ հայ բեռնափոխադրողը կունենա լրացուցիչ եկամուտ։ Դրան էլ կհետևեն ներդրումներն ու տրանսպորտային պարկի թարմացումը։
Հայաստանը ԵԱՏՄ անդամ է դարձել 2015 թվականին։
ԵԱՏՄ կանոնադրությամբ կաբոտաժային փոխադրումը ենթադրում է միջազգային փոխադրումների ճանապարհին միության մեկ այլ անդամ-պետության տարածքում մի կետից մյուսը բեռներ փոխադրելը։
