ԵՐԵՎԱՆ, 4 մայիսի — Sputnik. Արդեն երկրորդ օրն է՝ Գյումրիում 102-րդ ռազմաբազայի բնակսպասարկման ոլորտի աշխատակիցները հրաժարվում են աշխատել։ Այսօր նրանք բողոքի ակցիայով գնացել էին ռազմաբազա։ Sputnik Արմենիայի թղթակիցը հայտնում է, որ պատճառը վերջին երեք ամիսներին չվճարված աշխատավարձն է։
Աշխատավարձերի ուշացման պատճառը բողոքող աշխատակիցները չգիտեն, որովհետև նախկինում երբևէ աշխատավարձի այսքան ուշացում չի եղել: Երբեմն մեկ-երկու օր, բայց ոչ երեք ամիս, վստահեցնում են ակցիայի մասնակիցները:
Գործադուլավորների ունեցած տեղեկություններով`գումարը Մոսկվայից փոխանցված է, սակայն բնակսպասարկմամբ զբաղվող համապատասխան կազմակերպությունը դեռևս այն չի տրամադրել աշխատակիցներին: Խոսքը վերաբերում է շուրջ երկու հարյուր աշխատողի, որոնք գումար չեն ստացել։ Գործադուլավորները պահանջում են աշխատավարձի վճարման հստակ օր ու ժամ ասել, հակառակ դեպքում իրենց իրավունքների համար կպայքարեն մինչև վերջ:
Ակցիայի մասնակիցները ռազմաբազայի աշխատանքից չեն դժգոհում, քանի որ Գյումրի քաղաքի պայմաններում նորմալ աշխատանք ունեն, խնդիրը միայն աշխատավարձի ուշացումն է, որի պատճառով արդեն հսկայական պարտքեր են կուտակել: Այսօր բողոքող աշխատակիցները սպասում են պատասխանի ու չեն աշխատի, մինչև աշխատավարձ չստանան:
