ԵՐԵՎԱՆ, 5 մայիսի — Sputnik. Երևանն ու Սանկտ Պետերբուրգը համատեղ մի շարք հետաքրքիր նախագծեր են իրականացնում մշակույթի և զբոսաշրջության ոլորտում, ուրբաթ լրագրողներին ասաց Սանկտ Պետերբուրգի նահանգապետ Գեորգի Պոլտավչենկոն։
Նրա խոսքով` պետերբուրգցիների շրջանում մեծ հետաքրքրություն է առաջացրել ներքին անձնագրերով Հայաստան գալու որոշումը։
«Այս երկրի հնագույն մշակույթը հոգեհարազատ է ռուսներին, քանի որ երկար տարիներ միասին են եղել և այսօր էլ կրկին միասին են»,- ասաց Պոլտավչենկոն։
Նա նաև նշեց, որ լուրջ աշխատանք է տարվում կրթության ոլորտում` երեխաների ուսուցման ժամանակակից մեթոդների փորձի փոխանակման առումով։
«Վերջին տարիներին մենք համագործակցության լավ դինամիկա ենք նկատում։ Երբ 2015 թվականին պարոն Մարգարյանի հետ (Երևանի քաղաքապետ — խմբգ.) համագործակցության համաձայնագիր ստորագրեցինք, Հայաստանի և, առաջին հերթին, Երևանի ու Սանկտ Պետերբուրգի միջև ապրանքաշրջանառությունն, ընդհանուր առմամբ, աճեց 1.7 անգամ», — նշեց նահանգապետը` ընդգծելով, որ դա լավ ցուցանիշ է։
Պոլտավչենկոյի խոսքով` Հայաստանից ապրանքների նոր տեսականի է մատակարարվում Սանկտ Պետերբուրգ։
«Շատ կարևոր է, որ այս գործընթացը ոչ միայն արագացել է, այլև լավ հեռանկար ունի։ Օրինակ` այսօր մենք Երևանում Սանկտ Պետերբուրգի օրեր ենք անցկացնում և սպասում ենք, որ Երևանի մեր բարեկամները 2018 թվականին պատասխան այցով կժամանեն Սանկտ Պետերբուրգ», — ավելացրեց նա։
Ինչպես նշեց նահանգապետը, Սանկտ Պետերբուրգից Հայաստան են ժամանել բիզնեսի, առողջապահության, կրթության, սպորտի ոլորտի ներկայացուցիչներ։ Ըստ նրա` հետաքրքիր ծրագրեր կան բնակարանային-կոմունալ տնտեսության ոլորտի համագործակցությունը զարգացնելու համար, մասնավորապես Տարոն Մարգարյանի հետ պայմանավորվածություն է ձեռք բերվել տարածքների բարելավման հարցերով զբաղվելու, փորձի փոխանակման շուրջ։ Նրա խոսքով` չի բացառվում նաև, որ ջրահեռացման, կոյուղու, ջրամատակարարման համակարգերի զարգացման համատեղ նախագծեր իրականացվեն։
