ԵՐԵՎԱՆ, 5 մայիսի — Sputnik. Պետերբուրգյան հայտնի լուսանկարիչ Վլադիմիր Պլոտնիկովի և Սերգեյ Փարաջանովի ջերմ ընկերությունը նպաստել է նաև Հայաստանի հետ բարեկամական հարաբերություններին։ Երևանի պատմության թանգարանում բացված նրա ցուցահանդեսում փարաջանովյան լուսանկարներն անմիջապես աչք էին զարնում, հատկապես «Սերյոժայի» վառ ու անկրկնելի կերպարային լուծումների դեպքում։ Մինչև օրս Պլոտնիկովը նկարել է հանրահայտ անձանց, բայց ամենասիրելին մնում է այն լուսանկարը, որտեղ պատկերված է Փարաջանովը։
«Նա որոշ ժամանակ բնակվում էր իմ տանը` Պետերբուրգի հենց կենտրոնում, ուր գալիս էր ժամանակի մշակութային էլիտան։ Այդ ընթացքում Փարաջանովը ծանոթանում էր իմ աշխատանքներին, իսկ մեկնելիս մի գրություն թողեց` «Հիացած Փարաջանովը»»,- ժպիտով ներկայացրեց Վլադիմիր Պլոտնիկովը։
Այսքանով Փարաջանովի մասին պատմությունները չդադարեցին։ Պլոտնիկովը մինչ օրս սրբության պես է պահում Սերգեյ Փարաջանովի այն կոլաժները, որոնք նվեր է ստացել նրա` բանտից դուրս գալուց հետո։ Կոլաժները պատրաստված են այն ամենից, ինչ կարելի էր գտնել բանտախցում` թերթեր, կեֆիրի խցաններ, որոնց նայելով երբեք չես գուշակի իսկությունը։
«Ես և Փարաջանովը հիանալի հարաբերություններ ունեինք։ Հիշում եմ, որ նա շատ էր սիրում նկարվել»,- ասաց լուսանկարիչը։
Sputnik Արմենիայի այն հարցին, թե ինչպես որոշեց լուսանկարչական ցուցահանդես ներկայացնել երևանցիներին, և առհասարակ ինչի՞ հետ է ասոցացվում Երևանը, նա նախ պատասխանեց, որ հրավերք ուներ։
«Երևանն ինձ մոտ ասոցացվում է նշենու ծաղկման հետ, ես Հայաստանում հաճախ եմ ճամփորդել գնացքով և զգացել ծիրանենու անուշ բույրը։ Երկրորդ տպավորությունս հետևյալն է` որ կողմ նայում ես, քարեր են»,-ասաց նա։
Վլադիմիր Պլոտնիկովի լուսանկարչական ցուցահանդեսը կգործի մինչև մայիսի 31-ը։
