ԵՐԵՎԱՆ, 5 մայիսի — Sputnik. ԱՄՆ կենտրոնական հրամանատարությունը հետաքննության արդյունքում եկավ այն եզրահանգման, որ ամերիկյան ավիացիան մարտի 16-ին ավիահարվածներ է հասցրել սիրիական Ալ Ջին գյուղի մերձակայքում գտնվող շինությանը, որը մզկիթի մի հատվածն է, հայտում է CNN հեռուստաալիքը` հղում անելով Պենտագոնի երկու պաշտոնական ներկայացուցիչների։
Հետաքննության ժամանակ պարզվեց, որ շենքը, որի ուղղությամբ ավիահարվածներ են հասցվել, նախկինում օգտագործվում էր կրոնական նպատակներով։
Նշվում է, որ ամերիկյան զինվորականներին արգելված է ավիահարվածներ հասցնել կրոնական նպատակների ծառայող շենքերին, հիվանդանոցներին և դպրոցներին։
Ընդ որում, նման շինությունները կարող են հանվել ավիահարվածներ հասնելու համար արգելված շենքերի ցանկից, եթե հաստատված է, որ օգտագործվում են ահաբեկիչների կողմից, գրում է RT-ն։ Սակայն չի նշվում, արդյո՞ք շենքից հանված է «պաշտպանիչ» կարգավիճակը, թե ոչ։ Մարտի 17-ին Կենտրոնական հրամանատարությունը հայտնել էր, որ «ավիահարվածի թիրախը մզկիթը չէր, այլ այն շենքը, որտեղ անցկացվում էր գրոհայինների հանդիպումը»։ Human Rights Watch հաշվետվության տվյալներով, Սիրիային հասցված ԱՄՆ-ի ավիահարվածի հետևանքով ավելի քան 40 խաղաղ բնակիչ է զոհվել։
