ԵՐԵՎԱՆ, 11 մայիսի — Sputnik. «Հարավկովկասյան երկաթուղի» ՓԲԸ գլխավոր տնօրեն Սերգեյ Վալկոյի ղեկավարած պատվիրակությունը մայիսի 3-4-ին Իրան կատարած այցի շրջանակներում հանդիպումներ է ունեցել Իրանի գործարարների, տրանսպորտային ընկերությունների և 46 նախարարությունների և գերատեսչությունների ներկայացուցիչների հետ:
Հանդիպմանը մասնակցել են նաև Հայաստանի տրանսպորտի, կապի և տեղեկատվական տեխնոլոգիաների նախարարության պատվիրակները, Իրանում Հայաստանի Արտակարգ և Լիազոր դեսպան Արտաշես Թումանյանը, որը մեծ աջակցություն է ցուցաբերել հանդիպման կազմակերպման և անցկացման հարցում:
Քննարկումը կազմակերպվել էր ՀԿԵ-ի խնդրանքով՝ Հայաստանի տարածքով, այդ թվում երկաթուղային ենթակառուցվածքի օգտագործմամբ, Իրանից եվրոպական երկրներ և հակառակ ուղղությամբ մուլտիմոդալ բեռնափոխադրումների իրականացման նախագիծը ներկայացնելու նպատակով: Դա ՀԿԵ պատվիրակության արդեն երրորդ նման հանդիպումն է իրանական կողմի ներկայացուցիչների հետ և հանդիպումից հանդիպում իրանական գործարարների հետաքրքրությունը միայն ավելանում է: Այս անգամ հետաքրքրված բոլոր գործարարներին չէր կարող տեղավորել նույնիսկ Իրանի Առևտրաարդյունաբերական պալատի մեծ դահլիճը:
«ՀԿԵ» ՓԲԸ-ն փոխադրումների այս միջանցքի գործարկման ուղղությամբ աշխատում է արդեն երկու տարի: Մուլտիմոդալ բեռնափոխադրումների կազմակերպման նախագիծը ներկայացվել էր մի շարք միջազգային համաժողովների շրջանակներում, այդ թվում 2016 թվականին Բաթումում անցած սևծովյան համաժողովում:
Գերմանական և վրացական երկաթուղիների աջակցությամբ արդեն իսկ կայացել է առաջին թեստային փոխադրումը Դույսբուրգ-Թեհրան երթուղով:
Հանդիպմանը ներկա եղած 120 գործարարներ և տրանսպորտային ընկերությունների ղեկավարներ մեծ հետաքրքրություն ցուցաբերեցին ներկայացվող նախագծի նկատմամբ: Բավական է ասել, որ շնորհանդեսից հետո ՀԿԵ գլխավոր տնօրեն Ս.Վալկոն պատասխանում էր իրանցի գործարարների հարցերին:
Իրանական կողմի ներկայացուցիչները հաստատեցին իրենց հետաքրքրությունը այս նախագծին: Իրանի տրանսպորտային ընկերությունների միության տվյալներով՝ Թուրքիայի տարածքով Եվրոպայից Իրան ուղևորվող ավտոտրանսպորտի մոտ 20% (400-500 ավտոմեքենա) ուշացվում է թուրքական կողմի մեղքով, ինչը խափանում է լոգիստիկ ողջ շղթան:
ՀՀ տրանսպորտի նախարարության դիրքորոշումը ներկայացրել և հարցերին պատասխանել է նաև երկաթուղու վարչության պետ Արսեն Մուսոյանը:
«ՀԿԵ» ՓԲԸ-ն հանդիսանում է «Ռուսական երկաթուղիներ» ԲԲԸ-ի դուստր ընկերություն և իրականացնում է Հայաստանի երկաթուղային համակարգի կոնցեսիոն կառավարումը: Համաձայն 2008 թ. փետրվարի 13-ին Երևանում կնքված պայմանագրի՝ կոնցեսիոն կառավարման ժամկետը կազմում է 30 տարի՝ կողմերի փոխադարձ համաձայնությամբ ևս 10 տարի երկարացման իրավունքով: