Հայկական Ժամանակ. «8 միլիոնի վնաս»
Ադրբեջանական ծագմամբ խնձորի ներկրումը ՀՀ պետական բյուջեին հասցրել է ավելի քան 8 միլիոն դրամի վնաս: Այսպիսի հաշվարկ է ներկայացրել ՀՀ քննչական կոմիտեն, որը քննում է նշված գործը: Այս գործով մեղադրանք է առաջադրվել 4 անձի:
Ըստ քրեական գործի տվյալների` հունվարից մինչև ապրիլի վերջ փոքր խմբաքանակներով ներկրված այդ խնձորի համար պետբյուջե պետք է վճարվեր 7.3 միլիոն դրամի հարկ: Եվս 900 հազար դրամի հարկ էլ պետք է վճարվեր դրա մանրածախ վաճառքից, որը, ըստ նյութերի, իրականացվել է Մալաթիայի շուկայում: Չորս անձանցից 2-ը, որոնց մեղադրանք է առաջադրված, Բագրատաշեն համայնքի բնակիչներ են, մյուս երկուսը` երևանցիներ:
Հրապարակ. «Սերժ Սարգսյանը խաղում է. ԱԺ խոսնակի «անսպասելի» ընտրություն է լինելու»
«Հրապարակ» թերթը գրում է. «Ավանդաբար հինգշաբթի օրերին կայացող ՀՀԿ նիստն այսօր չի կայանա, հնարավոր է` այն տեղափոխվի հաջորդ շաբաթ և հրավիրվի ԱԺ առաջին նիստին նախորդող օրերին, որի ժամանակ Սերժ Սարգսյանը կհայտարարի, թե ով ինչ պաշտոն կստանա:
Խնդիրն այն չէ, որ կիրակի Երևանի ավագանու ընտրություններն են, և ընտրարշավին լծվել է ՀՀԿ-ի ողջ ակտիվն ու պատրաստվում է Տարոն Մարգարյանի համար ջախջախիչ հաղթանակ ապահովել, այլև Սերժ Սարգսյանի գործելաոճն է այդպիսին՝ մինչև վերջ պահել ինտրիգը, խաղալ կուսակիցների նյարդերի վրա:
Ի դեպ, տեղեկություններ կան, որ ՀՀԿ-ն որոշել է խորհրդարանական մշտական հանձնաժողովների թիվը դարձնել 9, որից 6-ի նախագահությունը, ըստ Դոնթի բանաձևի, կհասնի ՀՀԿ-ին, 3-ը՝ «Ծառուկյան» դաշինքին, իսկ «Ելք»-ը չի ստանա:
Իշխանական շրջանակներում չեն բացառում նաև ԱԺ խոսնակի «անսպասելի» ընտրություն, բոլորովին նոր անուն, այդ թվում՝ չեն բացառում գործող Գալուստ Գրիգորիչի վերանշանակումը»:
Ժամանակ. «Կարեն Կարապետյանի պատասխանը Սերժ և Վիգեն Սարգսյաններին»
«Ժամանակ» թերթը գրում է. «Կարեն Կարապետյանն ավստրիական ռադիոյին տված հարցազրույցում հայտարարել է, որ պատրաստ է վարչապետ մնալ 2018 թվականից հետո նաև: Այդ թեմայով իր պատրաստակամության մասին Կարապետյանն առաջին անգամ չէ, որ հայտարարում է։ Այդ իմաստով նրա հավակնությունը, հետևաբար նաև Սերժ Սարգսյանի ծրագրերի հետ մրցակցությունն, այլևս նորություն չէ:
Կարապետյանի հարցազրույցում ուշագրավ է մեկ այլ բան՝ Իսրայելի օրինակի մատնանշումը պատերազմական, չկարգավորված հակամարտության պայմաններում Հայաստանի զարգացման հեռանկարի վերաբերյալ համատեքստում: Կարեն Կարապետյանը բերում է Իսրայելի օրինակն ու մատնանշում, որ Իսրայելն էլ ուներ ծանր պայմաններում զարգացման խնդիր և լուծեց այն:
Ինչո՞վ է հետաքրքրական օրինակը: Ինքնին, որպես մոդել, անշուշտ: Բայց այստեղ կա նաև ներքաղաքական հետաքրքրությունը կամ՝ ներիշխանական: Ի՞նչ է Իսրայելի օրինակը, զարգացման մոդելը: Այո՝ ազգ-բանակ: Այդ արձանագրումը, թերևս, բավարար է՝ պատկերացնելու համար, թե ինչ է ակնարկում Կարեն Կարապետյանն` Իսրայելի զարգացման օրինակը մատնանշելով:
Ժողովուրդ. «Արտեմ Ասատրյանը փնտրում է Սերժ Սարգսյանի և վարչապետի մոտ իր համար բարեխոսող նոր մարդկանց»
«Ժողովուրդ» թերթը գրում է. «ՀՀ աշխատանքի և սոցիալական հարցերի նախարար Արտեմ Ասատրյանն ամեն գնով ցանկանում է լինել նոր կառավարության կազմում ու այս օրերին ակտիվորեն զբաղված է իր հետագա պաշտոնավարման հարցը կարգավորելով:
Ինչպես պնդում են «Ժողովուրդ»-ի աղբյուրները, Ասատրյանը լուրջ մտավախություն ունի, որ իր ղեկավարած նախարարության ենթակայության տակ գտնվող հիմնարկություններում բացահայտված կոռուպցիոն սկանդալների պատճառով իրեն չեն վերանշանակի:
Ու հիմա նա փնտրում է նոր մարդկանց, որոնք կկարողանան Սերժ Սարգսյանի և Կարեն Կարապետյանի մոտ բարեխոսել իր համար ու համոզել, որ Ասատրյանին կրկին նախարար նշանակեն: Բայց եթե Սերժ Սարգսյանն ու Կարեն Կարապետյանն աչք փակեն մինչ այս բացահայտված կոռուպցիոն սկանդալների վրա ու կրկին նախարար նշանակեն Ասատրյանին, կստացվի, որ նրանք ոչ միայն աչք են փակում տեղի ունեցած հանցագործությունների վրա, այլև խթանում են նոր ապօրինությունները»:
