ԵՐԵՎԱՆ, 13 մայիսի — Sputnik. Երևանում, Արտաշատում և Արմավիրում սահմանապահ ջոկատներին կից գործող երեք դպրոցների աշակերտները մասնակցեցին «Խաղաղությամբ ու բարեկամաբար» ռազմահայրենասիրական խաղին, որը կազմակերպել էր ՀԱՊԿ ինստիտուտի հայաստանյան ներկայացուցչությունը՝ Ռուսաստանի ԱԴԾ սահմանապահ վարչության հետ համատեղ:
Միջոցառումը նվիրված էր Հավաքական անվտանգության պայմանագրի ստորագրման 25 ամյակին ու ՀԱՊԿ-ի կազմավորման 15 ամյակին:
Հայաստանում Ռուսաստանի արտակագ և լիազոր դեսպան Իվան Վոլինկինի խոսքով՝ այս տարեդարձը կարևոր նշանակություն ունի կազմակերպության մասնակից բոլոր երկրների համար։
«Սա շատ կարևոր միջոցառում է երիտասարդության դաստիարակության, հարենասիրական ոգու պահպանման և մեզ միավորող գաղափարի տեսանկյունից: Իսկ մեզ շատ բան է միավորում», — ասաց նա։
Օրեր առաջ նշվեց Հայրենական մեծ պատերազմի հաղթանակի 72 ամյակը, որին նվիրված միջոցառումներին մասնակցեցին հազարավոր մարդիկ: Վոլինկինի խոսքով՝ երիտասարդությունը հարգում ու հիշում է իր պապերին և այդ վերաբերմունքը կփոխանցի նաև եկող սերունդներին։
Դեսպանը հույս հայտնեց, որ նրանցից ոմանք կընտրեն «սահմանապահի ազնիվ մասնագիտությունը», որի շնորհիվ մարդիկ կարողանում են հանգիստ քնել։
Հայաստանում Բելառուսի դեսպան Իգոր Նազարուկն իր հերթին նշեց, որ այս միջոցառման մեջ ամենակարևորը «բարոյական և հոգևոր միջուկի ձևավորումն է», որի հիման վրա հետագայում բազմակողմանի անձնավորություն է ձևավորվելու։
Երևանի, Արտաշատի, Արմավիրի երեք դպրոցների աշակերտները մրցեցին 10 տարբեր վարժություններում՝ նռնակների նետում, հրաձգություն, առաջին բուժօգնության ցուցաբերում, աշխատանք ռադիոկայանի հետ և այլն։
Միջոցառման շրջանակում ռուսական սահմանապահները ցուցադրեցին, թե ինչպես են փնտրում և ձերբակալում սահմանախախտին, կինոլոգները ծառայողական շների հետ ցուցադրեցին իրենց վարպետությունը, հրաձիգներն էլ իրենց հմտությունները ցուցադրեցին:
Միջոցառման մասնակիցները կարող էին օգտվել հրաձգարանում տեղակայված դաշտային խոհանոցից:
