ԵՐԵՎԱՆ, 14 մայիսի — Sputnik. ՀՀԿ խոսնակ Էդուարդ Շարմազանովը քիչ առաջ լրագրողների հետ հանդիպմանը նշեց, որ կուսակցության շտաբը դրական է գնահատել Տարոն Մարգարյանի քարոզչության ընթացքը և քվեարկության արդյունքները:
«Ընդհանուր առմամբ դրական ենք գնահատում ընտրությունները, որոնք ևս մեկ անգամ վերահաստատեցին, որ Հայաստանն անշեղորեն գնում է ժողովրդավարության ճանապարհով»,- ասաց նա:
Ըստ Շարմազանովի՝ ընտրությունների նախնական արդյունքները շատ գոհացնող են, բայց նաև կանխատեսելի, քանի որ կուսակցությունը կոփված է ընտրություններում:
Քվեարկության արդյունքները դեռ ամբողջությամբ ամփոփված չեն, բայց ՀՀԿ-ն արդեն արձանագրել է, որ Տարոն Մարգարյանի գլխավորած թիմը համոզիչ հաջողություն է գրանցել:
«ՀՀԿ-ն շնորհակալություն է հայտնում երկու մրցակիցներին: Հուսով եմ, որ Տարոնը Մարգարյանը կաշխատի հանուն Երևանի: Հուսով եմ, որ մենք հինգ տարի հետո կունենանք ավելի ուժեղ Երևան»,- ասաց Շարմազանովը:
Նա շնորհակալություն հայտնեց բոլոր նրանց, ովքեր իրենց ձայնը տվել են Տարոն Մարգարյանին:
Նշենք, որ ԿԸՀ-ն արդեն հրապարակել է քվեարկության մասնակցած քաղաքացիների թիվը՝ 2017թ. մայիսի 14-ի Երևանի ավագանու ընտրություններին մասնակցել է 345 226 մարդ՝ ընտրողների 40,99%-ը:
Առայժմ մշակվել է 74 ընտրատեղամասերի արդյունքները, որոնց համաձայն՝ ՀՀԿ-ն ստացել է քվեների 68.45 տոկոսը, «Ելքը»՝ 23.24 տոկոսը, «Երկիր ծիրանի» կուսակցությունը՝ 8.31 տոկոսը:
