ԵՐԵՎԱՆ, 25 մայիսի — Sputnik, Արմենուհի Մխոյան. ԱՊՀ-ի գեղեցկուհիները Գյումրի ժամանեցին մայիսի 25-ին, ժամը 20:00-ին, «Պոբեդա» ավիաընկերության ինքնաթիռով: Գյումրու փողային նվագախմբի երաժշտական ուղեկցությամբ, ծաղիկներով, շամպայնով ու տորթով Գյումրիում դիմավորեցին «Միսս ԱՊՀ» գեղեցկության միջազգային մրցույթի մասնակիցներին ու հյուրերին:
Մրցույթի կազմակերպիչները, նպատակ ունենալով հյուրերին ցույց տալ Հայաստանի պատմական ու ճարտարապետական քաղաքներից մեկը՝ Գյումրին, շեղվելով «Զվարթնոց» օդանավակայանում հյուրերին դիմավորելու դասական տարբերակից, մրցույթի մասնակիցների դիմավորման պաշտոնական արարողությունը կազմակերպել էին Գյումրու «Շիրակ» օդանավակայանում:
«Հայաստան գալուց առաջ, ճիշտն ասած, շատ քիչ բան գիտեի Հայաստանի մասին, բայց այս մրցույթը երկիրը բացահայտելու շատ լավ հնարավորություն է: Հուսով եմ՝ կհասցնենք տեսարժան վայրեր այցելել: Ճանապարհը դժվար էր. 2 ինքնաթիռ ենք փոխել, մինչև հասել ենք Գյումրի, բայց ընդունելությունն անսպասելի էր: Մենք ցնցված ենք՝ ոչ մեկս նման ընդունելություն չէինք սպասում»,- նշեց Ղրիմի ներկայացուցիչ Քսենյա Ռասինը:
Թեև ուշ ժամի պատճառով աղջիկներին չհաջողվեց տեսնել Գյումրին իր ողջ գեղեցկությամբ, սակայն ջերմ ընդունելությունը բավարար էր, որ նրանք Գյումրի գալու և քաղաքի մշակութային հարուստ ժառանգությունը տեսնելու ցանկություն հայտնեն:
«Միսս ԱՊՀ» միջազգային մրցույթի և համառուսական տարբեր գեղեցկության մրցույթների կազմակերպիչ «Ալեքս Գրուպ» ՍՊԸ պրոդյուսերական կենտրոնի գործադիր տնօրեն Օլգա Շումիլովան Sputnik Արմենիային տեղեկացրեց, որ այս մրցույթը ԱՊՀ երկրների ամենագեղեցիկ աղջիկներին համախմբելու նպատակ ունի:
«Այս մրցույթի շնորհիվ բոլորը տեսնելու են ԱՊՀ երկրների ամենագեղեցիկ աղջիկներին»,- ասաց նա:
«Միսս ԱՊՀ» միջազգային մրցույթը Հայաստանում է անցկացվելու ոչ միայն այս տարի, այլև հետագա տարիներին ևս:
«Պայմանագրի համաձայն՝ մրցույթի եզրափակիչ փուլը միշտ կազմակերպվելու է Հայաստանում»,- Sputnik Արմենիայի թղթակցի հետ զրույցում նշեց մրցույթի հիմնադիր և կազմակերպիչ Նաիրի Մնացականյանը։
«Միսս ԱՊՀ» մրցույթի մասնակիցներն ու հյուրերը Հայաստանում կմնան մինչև հունիսի 8-ը։ Գլխավոր փորձը տեղի կունենա հունիսի 5-ին, իսկ եզրափակիչ փուլը` հունիսի 6-ին։ «Միսս ԱՊՀ» տիտղոսի համար պայքարող բոլոր մասնակիցները նվերներ կստանան, իսկ առաջին երեք տեղը զբաղեցրած գեղեցկուհիները կստանան նաև դրամական մրցանակ, ուղևորության տոմսեր և ֆոտոսեսիաների մասնակցելու հնարավորություն։
Միջոցառմանն աջակցել են ԱՊՀ Միջպետական կոմիտեն, ՀՀ տնտեսական զարգացման և ներդրումների նախարարությունը, Երևանի քաղաքապետարանը:
«Միսս ԱՊՀ 2017»-ի եզրափակիչ փուլի ժյուրիի կազմում ընդգրկված են ոլորտի 11 փորձառու մասնագետներ` 3-ը` Հայաստանից, 4-ը՝ Ռուսաստանից և 4-ը՝ ԱՊՀ անդամ այլ երկրներից։
