ԵՐԵՎԱՆ, մայիսի 26 — Sputnik. Սպասը, որը Հայաստանում ամենամեծ տարածում ունեցող ուտեստներից է, մանավանդ տարվա ցուրտ եղանակին, կարող է փոխարինել ռուսական մածնաբրդոշին ու իսպանական գասպաչոյին։
«Ռուսական ռեստորանների շեֆ-խոհարարներն առմանը սկսում են մածնաբրդոշ և գասպաչո պատրաստել։ Որպես կանոն, այդ երկու սառը ուտեստներով երևակայությունը սպառվում է։ Մենք պարզել ենք, թե ինչը կարող է ոգեշնչման աղբյուր դառնալ», — գրում է «Սառույցը չի հալչում. մածնաբրդոշի և գասպաչոյի 8 այլընտրանք» հոդվածի հեղինակ Իվան Գլուշկովը։
Հեղինակը նշում է, որ հայկական սպասն, ի տարբերություն այլ ավանդական կաթնային ապուրների, ուրիշ տեխնոլոգիա ունի։
«Բուն ուտեստը շատ թանձր ու սննդարար է ստացվում։ Մածունը խառնում են խփած ձվի, ալյուրի, ջրի և նախապես խաշած ձավարի հետ. Այդ խառնուրդը կամաց եփելով` հասցնում են եռման` անդադար խառնելով։ Եթե խոհարարը թեկուզ մի պահ շեղվի` ձուն կսեղմվի և սպասի մասին կարելի է մոռանալ։ Պատրաստի ապուրը սառեցնում են (իսկ ձմռանը տաք վիճակում են ուտում), համեմում են կանաչիով և տապակած սոխով», — գրում է Գլուշկովը։
Ավելի վաղ հայկական սպասի հանդեպ սեր էր խոստովանել Հայաստանում Ֆրանսիայի արտակարգ և լիազոր դեսպան Ժան-Ֆրանսուա Շարպանտիեն։
Հայկական սպասը համեմատաբար քիչ էներգետիկ արժեք ունեցող ուտեստ է, այդ պատճառով այն կարելի է օգտագործել բեռնաթափման օրերի ընթացքում, մանավանդ մեծ խնջույքներից հետո։ Հայաստանի մարզերից յուրաքանչյուրում սպասը տարբեր կերպ են պատրաստում։ Հիմնականում փոփոխվում են մեկ-երկու բաղադրիչները (ուրց, նեխուր, սոխ, անանուխ, համեմ)։