ԵՐԵՎԱՆ, 28 մայիսի — Sputnik. Հաջողակ ռեստորատոր և հեռուստահաղորդավար Գայանե Բրեիովայի «Գայանե ջանի խոհանոցը» գիրքը խոհարարության համաշխարհային մրցույթում երկրորդ տեղն է զբաղեցրել Woman Chef անվանակարգում: Այդ մասին Գայանեն գրել է Facebook սոցցանցի իր էջում:
«Best in the world Gourmand Cook Books Awards 2017»-ն ավարտվեց: Որքան շատ եմ ես սիրում խոհարարությունը: Որքան անկեղծ եմ ոււրախանում և սիրահարվում այն մարդկանց, որոնք իրենց կյանքը նվիրել են այս աննկարագրելի, գեղեցիկ, կարևոր ու համեղ գործին: Իմ առաջին գիրքը` «Գայանե ջանի խոհանոցը», իմ խոհարարական պատմությունները երկրորդ տեղն են զբաղեցրել Woman Chef անվանակարգում», — գրել է նա:
Գայանեն իր գրառման մեջ նաև նշել է, որ հայկական խոհանոցի մասին իմացել են նաև տարբեր երկրների ներկայացուցիչներ:
«Այսօր հայկական խոհանոցի մասին տեղեկացան տարբեր երկրների և մայրցամաքների բոլոր 200 ներկայացուցիչները: Իսկ այն, որ գիրքս Ռուսաստանն էր ներկայացնում, ևս մեկ անգամ ինձ համոզում է, որ ես պատահաբար չեմ տեղափոխվել այստեղ, սիրահարվել մայրաքաղաքին և ասել, որ սա իմ քաղաքն է և ես այստեղ եմ ապրելու և արարելու», — ընդգծել է նա:
Ինչպես հայտնում է Գայանեն, մրցույթում առաջին տեղը զբաղեցրել է Իսպանիան ներկայացնող մասնակիցը, իսկ երրորդը` Չինաստանի մասնակիցը:
