ԵՐԵՎԱՆ, 30 մայիսի — Sputnik. Եվրոպայում անվտանգության և համագործակցության կազմակերպության գլխավոր քարտուղար Լամբերտո Զանիերը ՀՀ արտգործնախարար Էդվարդ Նալբանդյանի հետ համատեղ ասուլիսի ընթացքում հայտարարեց, որ ԵԱՀԿ-ն դիտարկում է Հայաստանի հետ համագործակցության շարունակության հնարավորությունները տարբեր ծրագրերի շրջանակում։
2017 թվականի օգոստոսին ԵԱՀԿ գրասենյակը Հայաստանում կդադարի աշխատել այն վետոյի պատճառով, որը Ադրբեջանը դրել է Երևանում կազմակերպության առաքելության շարունակության վրա ։
«Դեռ շուտ է խոսել կոնկրետ ծրագրերի մասին, մենք կդիտարկենք գրասենյակի աշխատանքը։ Մենք կարող ենք շարունակել մեր աշխատանքը, մեր աջակցությունը որոշակի ոլորտներում, սակայն պետք է քննարկենք ֆինանսական հարցերը», — ասաց Զանիերը` պատասխանելով Sputnik Արմենիայի` ապագա համագործակցության ձևաչափերի վերաբերյալ հարցին։
Նրա խոսքով` այդ հարցը պետք է մշակել երկրի ղեկավարության հետ։
Զանիերը ցավով նշեց այն, որ հնարավոր չեղավ կոնսենսուսի գալ գրասենյակի գործունեության շարունակության հարցում։
«ԵԱՀԿ-ն կշարունակի օգնել Հայաստանին ընտրությունների անցկացման հարցում։ Կան նաև բազմաթից կարևոր հարցեր, որոնք դեռ ընթացքի մեջ են։ Մենք կդիտարկենք մեր համագործակցության ապագան»,- ասաց նա։
Հայաստանյան այցի շրջանակում նախատեսված է Զանիերի հանդիպումը ՀՀ նախագահ Սերժ Սարգսյանի հետ։
Հայաստանը Հարավային Կովկասում միակ երկիրն էր, որտեղ ԵԱՀԿ-ի գրասենյակ էր գործում։ Բաքվում 2000 թվականին բացված կազմակերպության գրասենյակը դադարեցրել էր գործունեությունը 2014 թավականի հունվարի 1-ին։ 1992 թվականին Թբիլիսիում բացված ԵԱՀԿ առաքելության ժամկետը լրացել է 2008 թվականի դեկտեմբերի 31-ին։
