ԵՐԵՎԱՆ, 2 հունիսի — Sputnik. D'Black Blues Orchestra հայտնի խումբը ցանկացած պահի պատրաստ է նոր համերգային ծրագրով ներկայանալ Արցախում։ Այս մասին Sputnik Արմենիա մուլտիմեդիոն մամուլի կենտրոնում լրագրողներին հայտնեց խմբի հիմնադիր և մենակատար Վլադիմիր Ավետիսյանը։
«Մենք արդեն բազմաթիվ անգամ ելույթ ենք ունեցել այնտեղ (Արցախում — խմբ.), նույնիսկ երկրպագուների բանակ ունենք։ Մեծ հաճույքով ենք այնտեղ ելութ ունենում։ Մենք պատրաստ ենք ցանկացած պահի արձագանքել հրավերին։ Դա բոլոր երաժիշտների սկզբունքային դիրքորոշումն է, մենք չենք անում դա ի հեճուկս ինչ-որ մեկի, չենք ցանկանում որևէ մեկի իրավունքները խախտել։ Պարզապես այնտեղ էլ են մարդիկ ապրում, երեխաներ ծնվում, մարդիկ հանդիպում են, սիրահարվում, կյանքը շարունակվում է…», — ասաց Ավետիսյանը։
Նրա կարծիքով` մարդիկ մեղավոր չեն, որ այդ տարածքում դեռ չլուծված քաղաքական խնդիրներ կան։
«Ինչի՞ համար պատժել նրանց։ Մենք երաժիշտների հետ քննարկել ենք այդ հարցը, քանի որ նրանց մեծ մասն արտասահմանցիներ են։ Նրանք նույն դիրքորոշումն ունեն», — ավելացրեց երաժիշտը։
Նրա խոսքով` եթե խումբն Արցախում ելույթ ունենալու հրավեր ստանա, իրենք կընդունեն առաջարկը։
«Դա է երաժիշտի առաքելությունը։ Երաժշտությունը սահմաններ, քաղաքական հայացքներ և համոզմունքեր չի ճանաչում։ Երաժշտությունը բոլորինն է` անկախ նրանից, թե որ տարածքում ես ապրում», — նշեց D'Black Blues Orchestra խմբի մենակատարը։
Նշենք, որ Արցախ այցելած օտարերկյա քաղաքացիները հաճախ են հայտնվում Ադրբեջանի «սև ցուցակում»։
