ԵՐԵՎԱՆ, 2 Հունիս — Sputnik. Ռուսաստանում բնակվում է շուրջ 2.5 մլն հայ։ Այդ մասին Պետերբուրգյան միջազգային տնտեսական ֆորումի շրջանակներում «Эхо Москвы» ռադիոկայանին տված հարցազրույցում հայտնել է Ռուսաստանում Հայաստանի արտակարգ և լիազոր դեսպան Վարդան Տողանյանը։
«Հստակ տվյալներ չկան ո՛չ ռուսական, ո՛չ էլ հայկական կողմի մոտ… Ընդհանուր առմամբ, 2-2.5 մլն հայ է բնակվում՝ ներառյալ Ռուսաստանի քաղաքացիներին, որոնք, իհարկե քանակային առումով ավելի շատ են»,– ասաց դիվանագետը։
Ընդ որում, Տողանյանը նշել է, որ Ռուսաստան հայերը գալիս են ոչ միայն Հայաստանից, այլև Կենտրոնական Ասիայի պետություններից։ Նա նշեց, որ շատերը Ռուսաստան են եկել Ուզբեկստանից, Թուրքմենստանից, ինչպես նաև Ադրբեջանից և Վրաստանից։
Դեսպանը հավելել է, որ հայկական դիվանագիտական ներկայացուցչությունը հյուպատոսական գրասենյակ ունի Դոնի Ռոստովում, Սանկտ Պետերբուրգում և Սոչիում։ Ռուսաստանի այլ շրջաններում, հատկապես կենտրոնական Ռուսաստանում, Ուրալում և Հեռավոր Արևելքում հյուպատոսարանների բացումը, Տողանյանի խոսքով, անհրաժեշտ է, սակայն դրա համար հարկավոր է նաև տեխնիկական և ֆինանսական աջակցություն։ Հայկական սփյուռքն այսօր ավելի քան 10 մլն է, ինչը գրեթե եռակի ավելի է Հայաստանի բնակչությունից։ Այսօրվա հայկական սփյուռքի հիմնական մասը կազմվել է Օսմանյան կայսրությունում իրականացրած Հայոց ցեղասպանության հետևանքով։ Տողանյանը երիտասարդ դիվանագետ է, այդ պաշտոնին նշանակվել է երկու ամիս առաջ։
