ԵՐԵՎԱՆ, 6 հունիսի — Sputnik. ՀՀ վարչապետ Կարեն Կարապետյանը հրաժարական տալու որևէ պատճառ չունի: Այս մասին Տավուշի մարզ կատարած աշխատանքային այցի ընթացքում Կողբի զորամասում կայացած խորհրդակցությունից հետո լրագրողների հետ զրույցում հայտարարել է ՀՀ նախագահ Սերժ Սարգսյանը։ Այս մասին հայտնում է «Արմենպրեսը»։
ՀՀ նախագահը հերքել է իր և վարչապետի միջև լարված հարաբերությունների վերաբերյալ հրապարակումները և լուրերը, թե Կարեն Կարապետյանը պատրաստվում է հրաժարական ներկայացնել:
«Իսկ պարբերաբար հրապարակվող լուրերը իբր գոյություն ունեցող հակասությունների, հակամարտության մասին, մտացածին են: Մենք թե' կուսակցության, թե' իշխանության մակարդակով շատ լավ հասկանում ենք, թե ովքեր են այդ բեմականացման հեղինակները, ինչպիսին են նրանց ցանկությունները, բայց կարծում եմ, որ դա իրավիճակի վրա որևէ ազդեցություն ունենալ չի կարող»,– ասել է ՀՀ նախագահը:
Նշենք, որ «Ժողովուրդ» թերթն այսօրվա համարում գրել էր, որ վարչապետ Կարեն Կարապետյանը երկու անգամ փորձել է հրաժարական ներկայացնել, սակայն Սերժ Սարգսյանը հրաժարվել է այն ընդունել և համոզել է, որ շարունակի պաշտոնավարումը:
Թերթի աղբյուրների պնդմամբ` Կարապետյանը կարճ է պաշտոնավարելու, և ՀՀԿ-ն արդեն սկսել է հասարակությանը կամաց-կամաց պատրաստել վարչապետի փոփոխությանն ու այդ պաշտոնում Սերժ Սարգսյանի նշանակմանը:
