ԵՐԵՎԱՆ, 7 հունիսի — Sputnik, Խաչիկ Չախոյան. Քորֆբոլը հիմա շանսեր ունի 2024 թվականին հայտնվել օլիմպիական մարզաձևերի ցանկում: Իսկ Հայաստանում արդեն քորֆբոլի առաջնություններ են անցկացվում:
Հոլանդացի ուսուցիչ Նիկո Բրուկխուիսենը 1902 թվականին ստեղծեց քորֆբոլ խաղը, որը արդեն մուտք է գործել նաև Հայաստան, ու հոլանդացի մասնագետ Ատտե վան Հաստրեխտի գլխավորությամբ հայ մարզիկները փորձում են հմտանալ այս մարզաձևում:
Հայաստանում քորֆբոլը զարգացնելու առաջին քայլերը կատարվեցին, երբ մեր թիմն Ատտե վան Հաստրեխտի հրավերով մեկնեց Հոլանդիա, որտեղ էլ բանակցությունների միջոցով մասնագետի հետ հայկական կողմը համաձայնության եկավ, ու հոլանդացին ժամանեց Հայաստան: Վան Հաստրեխտը այդ թեմային անդրադառնալով նշեց, որ տարօրինակ բան չկա, որ հոլանդացի մարզիչը մեկնում է այլ երկիր քորֆբոլը զարգացնելու ու մասսայականացնելու համար, քանի որ քորֆբոլի հայրենիքը հենց Հոլանդիան է:
Ատտե վան Հաստրեխտի խորին համոզմամբ քորֆբոլը պետք է որպես խաղ քարոզել, քանի որ այն եզակի է իր բնույթով: Եթե ֆուտբոլում կամ հանդբոլում կան տղամարդկանց կամ կանանց թիմեր, ապա քորֆբոլում նույն թիմի կազմում կարող են հանդես գալ տղամարդիկ և կանայք, տղաները և աղջիկները միասին:
Որոշ նմանություն քորֆբոլի ու բաստկետբոլի կամ հանդբոլի մեջ կարելի է գտնել: Բայց դա միայն թվում է, քանի որ մարզաձևը լրիվ տարբերվում է մնացածից: Նախ` արդեն նշվեց, որ յուրաքանչյուր թիմի կազմում կարող են հանդես գալ տարբեր սեռերի մարդիկ, բացի այդ գնդակով վազել կամ շարժվել առաջ չի կարելի: Պետք է, անպայման, փոխանցում կատարել թիմակցիդ: Իսկ օղակները կարող են տեղադրված լինել խաղադաշտի կենտրոնին մոտ, իսկ գրոհելու հնարավորություն տրվում է նաև զամբյուղի հետևից: Ի դեպ, զամբյուղը (քորֆը) գտնվում է 3,5 մետր բարձրության վրա:
Բնականաբար, Հայաստանում այս մարզաձևը զարգացնելու համար հարկավոր է, որ շատ մարդիկ զբաղվեն քորֆբոլով: Ատտե վան Հաստրեխտի կարծիքով այնքան էլ լավ պայմաններ չկան, դահլիճները պիտի ավելի բարվոք վիճակում լինեն: Չարենցավան քաղաքի սպորտ դպրոցի տնօրենի հետ արդեն համաձայնություններ են ձեռք բերվել այդ առումով: Եվ շուտով հնարավոր է հենց այդ դահլիճում էլ անցկացվի Հայաստանի առաջնությունը: Պարզապես, պետք է երեխաներին դպրոցական հասակից ծանոթացնել քորֆբոլին, ինչ էլ հիմք կհանդիսանա մարզաձևի զարգացման համար:
Քորֆբոլը զարգացման բավականին երկար ճանապարհ է անցել, մարզաձևի հետնորդները ձգտում են օլիմպիական ընտանիքի անդամ դառնալ: Աշխարհի և Եվրոպայի առաջնություններ են անցկացվել շատ անգամ: ՄՕԿ նախագահ Թոմաս Բախը հավանել է մարզաձևը, առաջնայինը նշելով, որ սեռական միահավասարությունը սպորտում շատ կարևոր է, ու Քորֆբոլը մեծ շանսեր ունի օլիմպիական մարզաձև դառնալու: Ինչպես նշեց Ատտե վան Հաստերիխը, 2024 թվականին շատ հնարավոր է, որ քորֆբոլը դառնա օլիմպիական մարզաձև: Ներկայումս քորֆբոլը տարածված է ավելի քան 70 երկրում, բայց օլիմպիական ընտանիքի լիարժեք անդամ դառնալու համար հարկավոր է, որ մարզաձևով զբաղվեն բոլոր մայրցամաքներում:
