ԵՐԵՎԱՆ, 13 հունիսի — Sputnik. Դողս գյուղը երեկ երեկոյան տեղացած կարկուտից տուժած համայնքներից մեկն է։ Կարկուտը 100 տոկոսով ոչնչացրել է գյուղի բանջարաբոստանային կուլտուրաների բերքը, խաղողն էլ հավասարեցրել է գետնին։ Sputnik Արմենիայի հետ զրույցում իրավիճակն այսպես նկարագրեց գյուղապետ Գրիշա Հարությունյանը։
Նույնիսկ ծառի վրա մնացած հատուկենտ պտուղները վնասված են, այնպես որ եթե նույնիսկ հնարավոր լինի վաճառել, ապա, ըստ գյուղապետի, առավելագույնը` 30-50 դրամով։
Գյուղացիները մեծ հույսեր չեն կապում կառավարության ու գյուղնախարարության ներկայացուցչների այցի ու տեղում կազմած արձանագրությունների հետ, քանի որ անցյալ տարի ևս գյուղը տուժել էր կարկտից ու ոչ մի փոխհատուցում չէր ստացել։
«Միայն զիջել են ջրի հարկը։ Ուրիշ ոչինչ։ Իսկ միայն ջրի հարկ զիջելով գյուղացին չի կարող իր երեխային կերակրել»,- ասաց գյուղապետը` ընդգծելով, որ դողսեցիները բոլորն էլ բանկերից վերցրած վարկեր ունեն ու հիմա նաև այդ վճարումներն անելու խնդրի առաջ են կանգնած։
Դողսի մոտ հակակարկտային կայան չկա, բայց գյուղապետը նշում է, որ հարևան գյուղերից մի քանիսը, որոնք հակակարտկտային համակարգ ունեն, գրեթե նույնքան են տուժել, որքան Դողսը. կայանի առկայությունն էլ գյուղացիներին ոչ մի օգուտ չի տվել։
