ԵՐԵՎԱՆ, 13 հունիսի – Sputnik. Նախօրեին տեղացած կարկուտը մեծ վնասներ է հասցրել գյուղական մի շարք համայնքներին։ Sputnik Արմենիան հակակարկտային կայանների արդյունավետության շուրջ զրուցել է Ագրարագյուղացիական միության նախագահ Հրաչյա Բերբերյանի հետ։
Հայաստանյան հակակարկտային կայաններն արդյունավետ չեն և լուրջ կարկուտի դեպքում որևէ օգուտ չեն կրող տալ գյուղացուն։ Sputnik Արմենիայի հետ զրույցում նման դիտարկում է արել Հայաստանի ագրարագյուղացիական միության նախագահ Հրաչյա Բերբերյանը։
Անդրադառնալով Հայաստանում կիրառված ու կիրառվող հակակարկտային կայաններին` Հրաչյա Բերբերյանը նշեց, որ դրանցից ամենաարդյունավետը 80-ականների սկզբում փորձարկված հրթիռային համակարգն է, որը միջինը 70 տոկոս արդյունավետություն ունի։ Բերբերյանի խոսքով` այդ համակարգը կարող է գործարկվել, բայց դրա համար անհրաժեշտ են փորձառու, պատրաստված մասնագետներ, ինչպիսիք Հայաստանում չկան։ Բացի այդ իշխանությունները հակված են առավել անարդյունավետ սարքեր ձեռք բերել։
Դրանցից է նաև ներկայում գործարկվող բութանային համակարգը, որն, ըստ Բերբերյանի, առավելագույնը 6 կմ հասանելիություն ունի և չի կարող արդյունավետ լինել։
«Այդ սարքերը սկսեցին Հայաստանում արտադրել, անհայտ է, թե որտեղ էին փորձարկել։ Այդպես էլ գաղտնիք մնաց, թե դրանց արդյունավետությունն ինչ հանձնաժողով էր ընդունել։ Այսինքն, ինչ-որ անհայտ փաստաթղթերի հիման վրա պետությունը պատվեր էր տալիս, և խոսքը շատ լուրջ գումարների մասին է` 30-40 հազար դոլար։ Այդ գումարները մսխվում էին, մեր կազմակերպությանն էլ պետական չինովնիկները ահաբեկեցին։ Ամեն ինչ մեր գլխով անցել է, բայց փաստը մնաց այն, որ մեր երկիրն այսօր այդ համակարգը չունի»,- ասաց Բերբերյանը։
Ի դեպ, նա նաև նշեց, որ այս համակարգերն իրենց անարդյունավետության համար ՀՀ նախագահի հրամանով դեռևս 4 տարի առաջ արգելվել էր ձեռք բերել, բայց ոլորտի պատասխանատուները շարունակում են պետական միջոցներով դրանց գնումն իրականացնել։ Այս տարի ևս, Հրաչյա Բերբերյանի պնդմամբ, դրանց գնման պատվեր կա։
