ԵՐԵՎԱՆ, 13 հունիսի — Sputnik. Աշխարհի առաջին տուրիստը՝ Նոյը, տուրիստական գործակալ Աստծո որոշմամբ էքստրեմալ տուրիզմի համար ընտրեց Հայաստանը։ Այսօր Sputnik Արմենիա մամուլի սրահում լրագրողների հետ հանդիպումն այս համեմատությամբ սկսեց Տուրիզմի հայկական ինստիտուտի ռեկտոր Ռոբերտ Մինասյանը՝ հավելելով, որ տուրիստական առաջին երկիր Հայաստանն այսօր համաշխարհային տուրիստական շուկայում իր տեղը վերագտնելու լուրջ խնդիր ունի։
Ռոբերտ Մինասյանը նշում է, որ պաշտոնական տվյալներով`անցյալ տարի Հայաստան է այցելել 1 մլն 250 հազար զբոսաշրջիկ։ Այս տվյալները, սակայն, նրա համոզմամբ, վերլուծության կարիք ունեն, ինչը պատշաճ չի կատարվում։ «Պետք է հասկանալ այդ ընդհանուր թվի մեջ քանիսն են տուրիստ, քանիսն են ուղղակի այցելու։ Եթե այցելուն մեկ գիշեր գիշերակաց է ունենում, նա արդեն կարող է տուրիստ համարվել։ Երկրից բացակայած անձը, եթե վերադառնում է մի քանի օրով հայրենիք, նա էլ արդեն կարող է տուրիստ համարվել»,- ասաց նա։ Իսկ, թե որքան գումար է զբոսաշրջությունն ավելացնում պետական բյուջե, Ռոբերտ Մինասյանի խոսքով, հաշվարկ ընդհանրապես չի արվում, կամ արվում է, բայց պաշտոնապես չի հրապարակվում։
Այդուհանդերձ, բանախոսը, որ զբոսաշրջային ոլորտում աշխատանքի փորձ ունի նախկին և ներկա ղեկավարների հետ, նշեց, որ ներկա կառավարության մոտեցումներից գոհ է, բայց չի շտապում գնահատականներ տալ՝ սպասելով արդյունքներին։ «Ես գոհ եմ, շնորհակալ եմ նոր վարչապետի մոտեցումներից, որ տուրիզմի կոմիտե ստեղծվեց, ստեղծվեցին ծրագրեր Հայաստանի համար, որ մենք պետք է իրականացնենք։ Եթե վարչապետի կողմից հնչեցվել է, որ «Մաքուր Հայաստան» ծրագիր պետք է իրականացվի, և սկսվել է ծրագիրը, ես ուզում են վերջը տեսնեմ»,– ասաց բանախոսը։ Իսկ վարչապետի հանձնարարությունների կատարման երաշխիքը Ռոբերտ Մինասյանը համարում է չարվածի համար խիստ պատասխանատվությունը` առաջարկելով նման դեպքերում պաշտոնանկ անել ՏԻՄ պաշտոնյաներին։
Տուրիզմի զարգացման հարցում Ռոբերտ Մինասյանը մեծ հույսեր է կապում Մետաքսի ճանապարհի նախագծում Հայաստանի ներգրավման հետ։ Մյուս կողմից էական առաջընթաց կգրանցվի ճիշտ տեղեկատվական աշխատանքի և պրոֆեսիոնալ գիդերի ինստիտուտի ներդրման պարագայում։
