ԵՐԵՎԱՆ, 15 Հունիս — Sputnik. Մոսկվայի «Արարատ» ֆուտբոլային ակումբի լավագույն տարբերանշանի համար հայտարարած մրցույթն ավարտվեց, գրված է Вконтакте սոցցանցի` թիմի պաշտոնական էջում։
Մոսկվայի «Արարատ» ակումբի պաշտոնական փոստին ավելի քան հարյուր տարբերանշան և ակումբի համազգեստ էր ուղարկվել, հիշեցնենք, որ մրցույթի միակ պայմանը տարբերանշանը սև–դեղին գույների մեջ անելն էր և վրան Արարատ լեռան ու առյուծի պատկերների առկայությունը, գրված է հաղորդագրության մեջ։
Ակցիայի կազմակերպիչները աշխատանքներ ստացան Ռուսաստանից, Հայաստանից, Ուկրաինայից, Գերմանիայից, Ավստրալիայից և այլն։ Երկար քննարկումներից հետո լավագույն տարբերանշանի մրցույթում հաղթող ճանաչվեց «Կրասնոդարի» ՖԱ–ի դիզայներ Դանիլա Վոլկը։
««Արարատ» ՖԱ–ի տրանսֆերային բարձրագոչ քաղաքականությունը հազարավոր մարդկանց, այդ թվում նաև ինձ, իրենց սոցցանց բերեց։ Այնտեղ ես տեսա օգնության խնդրանք և չկարողացա կողքով անցնել։ Նման ամբիցիոզ ակումբը պարզապես չի կարող թույլ տալ, որ իր տարբերանշանը, որը յուրաքանչյուր խաղացող կրելու է սրտի մոտ, հաղթանակի համար դաշտում «մարտնչելիս», նկարի դիլետանտը։ Դա պարզապես անթույլատրելի է։ Այդ պատճառով ես, որպես «Կրասնոդար» ՖԱ–ի գրաֆիկական դիզայներ, պարզապես պարտավոր էի օգնել»,– գրել է Վոլկը։
Ինչպես նշվում է հաղորդագրության մեջ, կային նաև այնպիսիք, ովքեր որոշել էին ուղարկել տարբերանշանի «ուրախ» տարբերակներ։ Տարբերանշանի վրա հայտնի երգիչ Լև Լեշենկոյի և Արարատ լեռան պատկերը զետեղած հեղինակն արժանացավ «համակրանք» մրցանակին։
